2 prilli shënoi Ditën Botërore të Autizmit edhe në vendin tonë. Organizata të ndryshme joqeveritare ngritën zërin e tyre edhe këtë ditë, për të kërkuar mbështetje nga shteti për të ofruar një hapësirë të barabartë edhe për personat me autizëm.
Miratimi i Ligjit për Shërbime Sociale dhe Familjare, si dhe Ligjit për Gjithëpërfshirje ishin dy nga kërkesat që Asociacioni Nacional i Autizmit në Kosovë (ANAK) kërkoi të punohen nga shteti ynë, aty ku në vizitë ishte edhe Kryeministri i vendit, Albin Kurti.
Mes tjerash, gjatë kësaj vizite, u diskutuan edhe për modele të ndryshme rreth integrimit të personave me autizëm edhe në tregun e punës – aty ku ata mund të shprehin talentet me të cilat rrethohen por edhe njëkohësisht aftësitë e tyre për të thyer barrierat në shoqëri.
Në një postim në faqen e tij zyrtare, Kurti është shprehur se aty ku nevojat janë më të mëdha duhet ofruar edhe ndihmë.
“Ne jemi zotuar që t’i përmbushim obligimet që i kemi detyrë e përgjegjësi. Aty ku nevojat janë më të mëdha, aty duhen edhe ndihma, edhe kontributi.”, ka thënë ai.
Në të gjithë botën, data 2 Prill shënon ditën për vetëdijësim ndaj autizmit.
Autizmi nuk është një sëmundje; ai është një çrregull neurozhvillomor që prek fushën e komunikimit e aftësitë sociale tek individi. /Gazeta Shneta/