Instituti Kombëtar i Shëndetësisë Publike të Kosovës, ka njoftuar se nga 16 prilli deri më 25 maj 2026 janë konfirmuar gjithsej 20 raste me fruth në Kosovë.
Sipas të dhënave të publikuara nga IKShPK, vetëm gjatë javës së kaluar janë raportuar edhe dy raste të reja të kësaj sëmundjeje ngjitëse.
Komuna me numrin më të madh të rasteve është Ferizaj me shtatë raste, pasuar nga Prishtina dhe Kaçaniku me nga katër raste. Nga një rast është regjistruar edhe në Lipjani, Fushë Kosova, Gjilani, Shtimja dhe Obiliqi.
IKShPK ka bërë të ditur se të gjitha rastet e konfirmuara janë persona të pavaksinuar me vaksinën MMR dhe se kanë kërkuar trajtim spitalor.
Instituti u ka bërë thirrje qytetarëve që në rast të simptomave të dyshimta, si temperaturë e lartë, skuqje apo ndryshime në lëkurë, kollë dhe rrufë, të paraqiten menjëherë në institucionet shëndetësore.
Duke pasur parasysh natyrën shumë ngjitëse të fruthit dhe rrezikun e përhapjes së mëtejshme, IKShPK ka apeluar te prindërit që të kontrollojnë statusin e vaksinimit të fëmijëve dhe të realizojnë vaksinimin në qendrat e mjekësisë familjare.
Sipas institutit, vaksinimi mbetet masa më efektive dhe më e sigurt për parandalimin e fruthit dhe mbrojtjen e shëndetit publik./Gazeta Shneta/