Koalicioni i OJQ-ve për Mbrojtjen e Fëmijëve në Kosovë (KOMF) ka ngritur shqetësimin se Klinika e Pediatrisë në Qendrën Klinike Universitare të Kosovës (QKUK) vazhdon të përballet me mungesë të personelit, mbingarkesë të shërbimeve dhe mungesë të barnave, duke ndikuar në cilësinë e kujdesit shëndetësor për fëmijët.
Në një komunikatë për media, KOMF thekson se, sipas Kartës së Vlerësimit të publikuar nga organizata, mungesa e personelit shëndetësor dhe mbingarkesa e klinikave të pediatrisë mbeten ndër sfidat kryesore në ofrimin e kujdesit sekondar dhe terciar për fëmijët.
Sipas KOMF-it, Klinika e Pediatrisë në QKUK vazhdon të punojë me kapacitete të kufizuara, ndërsa numri i personelit shëndetësor mbetet i pamjaftueshëm në raport me numrin e pacientëve.
“Numri i personelit shëndetësor mbetet i pamjaftueshëm në raport me numrin e pacientëve fëmijë, duke ndikuar drejtpërdrejt në cilësinë e ofrimit të shërbimeve”, thuhet në komunikatë.
Organizata vlerëson se, ndonëse funksionalizimi i Spitalit të ri Kirurgjik Pediatrik ka përmirësuar një pjesë të shërbimeve në nivel terciar, një pjesë e madhe e shërbimeve pediatrike vazhdon të zhvillohet në objektin e vjetër të Klinikës së Pediatrisë, i cili, sipas saj, nuk përmbush standardet për ofrimin e shërbimeve cilësore dhe dinjitoze.
KOMF ngre shqetësim edhe për mungesën e barnave dhe materialeve shpenzuese në institucionet publike shëndetësore. Sipas organizatës, prindërit raportojnë vazhdimisht se detyrohen të sigurojnë me shpenzimet e tyre barna dhe materiale, përfshirë edhe ato që janë pjesë e Listës Esenciale.
“Mungesa e barnave dhe terapisë së nevojshme mund të ketë pasoja serioze për shëndetin e fëmijëve, ndërsa në mungesë të tyre, prindërit detyrohen t’i sigurojnë ato me shpenzimet e tyre, edhe kur bëhet fjalë për barna nga Lista Esenciale”, thuhet në komunikatë.
KOMF i bën thirrje institucioneve përgjegjëse që të ndërmarrin masa urgjente për rritjen e kapaciteteve njerëzore, përmirësimin e kushteve infrastrukturore dhe garantimin e furnizimit të rregullt me barna dhe materiale shpenzuese, në mënyrë që fëmijëve t’u sigurohet kujdes shëndetësor cilësor dhe i barabartë.