Instituti Kombëtar i Shëndetësisë Publike të Kosovës (IKShPK) njofton se nga data 16 prill deri më 20 korrik 2026 janë konfirmuar 69 raste me fruth në vend. Gjatë javës së fundit janë raportuar edhe gjashtë raste të reja.
Sipas të dhënave të IKShPK-së, numri më i madh i rasteve është regjistruar në Prishtinë me 21 raste. Pasojnë Ferizaji dhe Fushë-Kosova me nga 12 raste, Kaçaniku me shtatë, Lipjani me tre, ndërsa Vushtrria, Shtimja, Drenasi dhe Obiliqi kanë raportuar nga dy raste secila.
Nga një rast është konfirmuar në Podujevë, Gjilan, Deçan, Skenderaj, Shtërpcë dhe Viti.
IKShPK u bën thirrje qytetarëve që në rast të shfaqjes së simptomave të fruthit, si temperaturë e lartë, skuqje në lëkurë, kollë, rrufë ose konjuktivit, të paraqiten sa më shpejt në institucionet shëndetësore, transmeton Gazeta Shneta.
Instituti gjithashtu u kërkon prindërve dhe kujdestarëve të kontrollojnë statusin e vaksinimit të fëmijëve dhe të sigurojnë imunizimin sipas Kalendarit të rregullt të vaksinimit, duke theksuar se vaksina mbetet mënyra më efektive për parandalimin e fruthit dhe kufizimin e përhapjes së tij.
