Dy pacientë kosovarë, njëri 27 e tjetri 24 vjeçar, kanë vdekur në spitalet e Turqisë brenda 2 muajve
Endrit Vorfaj nga fshati Planjë i Prizrenit kishte udhëtuar për në Turqi për t’u trajtuar pasi ishte diagnostikuar me tumor në tru.
Në pamundësi të trajtimit dhe mungesës së kushteve në Kosovë, familja kishte kërkuar ndihmë për ta dërguar në Turqi. Fatkeqësisht, 24-vjeçari nuk gjeti shërim as atje duke ndërruar jetë më 24 prill.
Shërimin në Turqi nuk e gjeti as Valdet Zeqiraj. Tashmë i ndjeri, ishte diagnostikuar me sëmundjen e leukemisë. 27-vjeçari ka ndërruar jetë më datën 4 mars të këtij viti, shkruan Gazeta Express.
Mijëra pacientë kosovarë për çdo vit kërkojnë shërim jashtë vendit. Pothuajse çdo javë lajmërohet nga një pacientë i cili kërkon ndihmë për të udhëtuar jashtë Kosovës.
Ministria e Shëndetësisë vetëm vitin e kaluar ka paguar rreth 14 milionë euro për shërimin e pacientëve në vendet si Turqia dhe në ato evropiane.
Ndërkohë spitalet publike në Kosovë përballen me mungesa elementare për të kryer shërbimet ndaj pacientëve.
Personeli mjekësor përballet me mungesë barnash, medikamente e materiale shpenzuese elementare. /Gazeta Shneta/