Spitali Rajonal i Pejës ka lëshuar një raport lidhur me të trajtuarit nga aksidenti rrugor që ndodhi në rrugën Pejë-Istog. Sipas atij raporti, 10 raste janë me lëndime të gjymtyrëve, ku 4 raste kanë pësuar thyerje të këtyre pjesëve, derisa 5 raste janë trajtuar për thyerje të nofullës dhe 17 të tjera për lëndime sipërfaqësore.
Raportin e ka kumtuar kryeministri i Kosovës, Ramush Haradinaj, nëpërmjet një postimi në faqen zyrtare të tij në Facebook, shkruan Gazeta Shneta.
“Sapo pranova raportin nga Drejtori i Spitalit Rajonal të Pejës lidhur me aksidentin e trafikut që ka ndodhur sot në rrugën Istog -Pejë, fshati Jabllanicë e vogël, ku të përfshirë në aksident ishin 32 persona.”, shkroi i pari i ekzekutivit në postim.
Gjithashtu, sipas raportit, 21 persona janë liruar me vetë dëshirë, përderisa janë 11 pacientë nga të cilët 4 raste do të vazhdojnë trajtimin mjekësor në repartin ortopedik, ndërsa të tjerët do e vazhdojnë mjekimin në shtëpi.