Kompania farmaceutike “Trepharm” ka financuar udhëtimin e specialistëve të Klinikës së Mushkërive dhe Endokrinologjisë në një udhëtim në qytetin bregdetar, Side, në Turqi. Të dy klinikat kanë mbetur vetëm me mjekët kujdestarë gjatë ditës së enjte dhe të premte
Qyteti bregdetar i Turqisë, Side, është ‘pushtuar’ nga mjekët e Qendrës Klinike Unviersitare të Kosovës ditën e enjte. Specialistët e Klinikës së Mushkërive dhe Endokrinologjisë kanë udhëtuar për në qytetin turistik të mërkurën mbrëma me financim “ultra all inclusive” nga kompania farmaceutike “Trepharm”.
Në dy klinikat kanë mbetur nga 3-4 mjekë sa për të mbuluar kujdestaritë deri ditën e hënë kur do të kthehen mjekët nga qyteti bregdetar ku kanë shkuar për vazhdimin e edukimit.
Të paktën kështu e ka arsyetuar udhëtimin e mjekëve në Turqi, drejtoria e QKUK-së. Zyra për Media ka deklaruar se pulmologët kanë udhëtuar me leje pas kërkesës së drejtoreshës së Klinikës Dr. Rukije Mehmeti.
“Zyra për informim ju njofton se drejtoresha e Klinikës së Pulmologjisē, dr. Rukije Mehmeti, ka njoftuar drejtorin e përgjithshëm se 10 pulmologë të klinikës janë në edukim vazhdueshëm. Puna në ambulanca specialistike, kujdestari dhe konsultime është mbuluar 100% meqë ka pasur mjekë të mjaftueshëm në klinikë për reparte, ambulanca dhe konsultime”, thuhet në përgjigjen e QKUK-së.
Gazeta ka kontaktuar edhe me kompaninë “Trepharm” për të mësuar qëllimin e këtij udhëtimi, por zyrtarët e saj nuk i janë përgjigjur pyetjeve të drejtuara me email. E kjo nuk është hera e parë që kompanitë farmaceutike i çojnë mjekët në pushime dhe seminare në qytete bregdetare në Turqi. Këto udhëtime financohen me qëllim që mjekët t’i shpërblejnë kompanitë duke ua përshkruar barnat e tyre pacientëve. /Gazeta Shneta/