Brenda 24 orëve, Klinika e Gjinekologjisë Obstetrike në QKUK, ka pranuar dhjetëra raste të pacientëve që janë ankuar për raste të ndryshme shëndetësore.
Reparti i pranimit i kësaj klinike, ditë më parë ka nxjerr një vendim që të gjithë pacientët që do të lindin në këtë institucion duhet të sigurojnë ilaçet vetë.
Siç thuhet në njoftimin e fundit, pacientet shtatëzëna që janë në prag të lindjes për mjekët doemos duhet të sigurojnë 10 palë dorëza sterile si dhe 5 ampula Oxytocin 10 Ul.
Ndërkaq, drejtori i ri i kësaj klinike, Jakup Ismajli për Indeksonline ka thënë se vendimi në fjalë është marrë pasi ka mungesë të produkteve në fjalë.
“Po vendimi është marrë që nga vikendi që shkoi, ne kemi doza për një përdorim por jo për më shumë andaj edhe është bërë njoftimi. Do të jetë në fuqi derisa të furnizohemi. Besoj që brenda dy-tre ditëve do të bëhet furnizimi për produktet në fjalë”, ka thënë Ismajli.
Megjithatë, nuk është hera e parë që nga pacientët që kërkojnë kurim brenda klinikave të QKUK-së, u kërkohen edhe barëra nga Lista Esenciale që për detyrë t’i mbulojë e ka Ministria e Shëndetësisë, duke mos përjashtuar në këtë rast maskat, skallperët e produkte të ngjashme.