Dyshimet për keqmenaxhim në projektin e shumëpërfolur “Transformimi Farmaceutik”, po vazhdojnë edhe pas përzgjedhjes së drejtoreshës së Barnatores Qendrore të QKUK-së, Gëzime Pllana e cila mbante edhe pozitën e farmacistes përgjegjëse në kompaninë “Altupharma”. Në kuadër të këtij projekti QKUK ka hapur disa pozita për Shefa me rroga mbi 1 mijë euro. Kësisojë Barnatorja Qendrore do të bëhet me dy drejtorë, katër shefa të sektorëve dhe disa shefa të barnatoreve të klinikave.
Në kuadër të këtij projekti, Qendra Klinike Universitare do të punësojë edhe katër shefa të tjerë me koeficient 10.2 që i bie mbi 1 mijë euro rrogë. QKUK ka hapur konkurs për Shef të sektorit të barnave e citostatikëve, Shef i sektorit të materialeve medicinale, Shef i sektorit të produkteve jashtë listës esenciale dhe dezinfektueseve dhe pozita e fundit është Shef i furnizimit dhe distribuimit. Kjo e fundit dyshohet se është përgatitur me një person (emër i njohur për Gazetën) e cila veçse është e angazhuar në këtë projekt.
Gazeta Shneta ka kërkuar sqarime nga QKUK për titullin shkencor të drejtoreshës së përzgjedhur Gëzime Pllana, por nuk ka marr përgjigje. Gazeta ka mësuar se katër farmacistë të Barnatores Qendrore, përfshirë drejtoreshën, do të fillojnë specializimin në Klinikën e Biokimisë në QKUK. Gazeta nuk ka marr përgjigje nga QKUK nëse specializimi do të jetë në kundërshtim me pozitat e këtyre farmacistëve për shkak të orarit të punës, por zyrtarët nuk kanë dhënë sqarime.
Burime të Gazetës bëjnë të ditur se Sistemi për Menaxhimin e Stokut Farmaceutik i cili është ridizajnuar vitin e kaluar dhe ka filluar nga pika zero, nuk është duke funksionuar si dihet. Burime të Gazetës kanë deklaruar se zyrtarët përgjegjës për këtë sistem nuk po arrijnë të barazojnë stokun nga viti i kaluar, ndërsa nuk po mund të regjistrojnë produkte jashtë Listës Esenciale.
QKUK në përgjigjet zyrtare nuk ka dhënë shumë detaje lidhur me pyetjet e Gazetës. Zyra për informim deklaron se Shërbimi Farmaceutik në nivel të SHSKUK-së, i është nënshtruar një transformimi të tërësishëm.
“Janë krijuar barnatoret doracake nëpër klinikat e QKUK-së, ku klinikat furnizimin e kanë direkt nga barnatoret e tyre, e jo nga barnatorja qendrore sikurse më parë. Janë pranuar farmacistë të rinj në punë me qëllim që direkt të merren me procesin e planifikimit, porosisë dhe menaxhimit sa më të mirë të barnave dhe materialit shpenzues në klinika. Poashtu, është hapur konkursi për pranim të teknikëve të farmacisë, me qëllim që puna të jetë sa më e mirë. I gjithë organizimi i Shërbimit Farmaceutik në QKUK dhe SHSKUK, është i bazuar në organogramin e miratuar në Bordin Drejtues të SHSKUK-së. Të gjitha pozitat e parapara sipas organogramit do të hapen konform Ligjit të Punës dhe Udhëzimit Administrativ 07/2017 që rregullon themelimin e marrëdhënies së punës”, thuhet në përgjigjen e QKUK-së.
“Askush nuk mund të paragjykoj personat që do të vendosen në pozicione, ngase Ligji i Punës garanton barazi për të gjithë, pra secili që mendon se përmbushë kriteret e konkursit publik ka të drejtën të aplikoj”, përfundon përgjigja.
QKUK nuk ka dhënë sqarime pse është dashur të bëhet krejt ky decentralizim i BQ-së dhe të krijohen pozita për shefa me rroga mbi 1 mijë euro. Kujtojmë se QKUK e ka hapur edhe pozitën e Drejtoreshës së BQ-së në QKUK, pozitë kjo e cila veçse ka ekzistuar më parë në kuadër të Koordinatores për Shërbimin Farmaceutik të SHSKUK-së. Kësisojë Barnatorja Qendrore do të bëhet me dy drejtorë, katër shefa të sektorëve dhe disa shefa të barnatoreve të klinikave.
Gazeta ka raportuar edhe më parë për këtë projekt, për shpenzimet që po bëhet për krijimin e barnatoreve të klinikave dhe reparteve. QKUK ka hapur disa tenderë në kuadër të këtij projekti, por kostoja finale ende nuk dihet. Stafi i BQ-së më herët ishte ankuar se janë detyruar të nënshkruajnë kërkesa për blerje të inventarit për barnatoret e klinikave. Ndërkaq ministri i Shëndetësië pati bërë një gafë kur me një postim në Facebook përpiqej të paraqiste gjendjen e rëndë të barnatoreve të klinikave me disa fotografi të barnatoreve të reparteve. QKUK kishte emëruar edhe shefa të barnatoreve të klinikave, të cilat në fakt ende nuk ishin funksionalizuar. /Gazeta Shneta/