U.D. e drejtoreshës së Klinikës Infektive në QKUK, Dr. Lindita Ajazaj-Berisha, ka mbajtur sot një konferencë për media ku ka dhënë detaje për gjendjen shëndetësore të punonjësve të KQZ-së të cilët dyshohet se u helmuan gjatë ditës së djeshme gjatë hapjes së zarfeve të ardhur nga Serbia.
Ajo ka bërë të ditur se në Klinikën Infektive momentalisht janë duke u trajtuar 11 pacientë nga ky rast, 9 femra 2 prej të cilave janë shtatzënë dhe 2 meshkuj të tjerë. “Pacientët duhet të qëndrojnë në klinikë, duhet të observohen dhe në momentin që ne e shohim se gjendja e tyre është për të shkuar në shtëpi do të lirohen”.
Ajazaj-Berisha ka treguar se gjendja shëndetësore e dy grave shtatzëna është stabile.
”Sa i përket shtatzënave sot kemi marrë mendim edhe tek gjinekologu, e sipas tij gjendja shëndetësore edhe shtatzënës është e mirë por edhe e fëmiut po. Në Klinikën Infektive nuk kemi pranuar më parë pacientë me reaksione të tilla nga ky rast”, ka thënë Ajazaj-Berisha. /Gazeta Shneta/
