Ministri i ri i Shëndetësisë nga radhët e Lëvizjes Vetëvendosje Dr. Arben Vitia, tashmë ka zyrtarizuar edhe dy këshilltarë në kabinetin e tij.
Dr. Mirsad Shkreta është emëruar Këshilltar i Lartë i ministrit dhe Shef i Kabinetit të tij, ndërsa Dr. Sami Uka është emëruar Këshilltar Politik, shkruan Gazeta Shneta.
Dr. Mirsad Shkreta është specialist i kirurgjisë orale. Rrugëtimin e tij politik ai e kishte filluar me Partinë Demokratike të Kosovës në Han të Elezit ku edhe ishte zgjedhur asamblist komunal. Ndërkaq në vitin 2014 ai kishte aderuar nga PDK në Lëvizjen Vetëvendosje ku është edhe sot.
Në vitin 2017 Shkreta kishte kandiduar për deputet të Kuvendit të Kosovës por nuk kishte arritur të merrte votat e mjaftueshme. Po këtë vit ai ishte punësuar edhe në Qendrën Klinike Stomatologjike të Kosovës në pozitën e kirurgut oral, kohë kjo kur QKUK menaxhohej nga Dr. Curr Gjocaj.
Dr. Sami Uka është mjek familjar dhe punon në Qendrën Kryesore të Mjekësisë Familjare në Prishtinë ku mban pozitën e Kryeshefit.
Uka ka punuar më herët në Organizatën Botërore të Shëndetësisë. Ai është vëllai i deputetit të Lëvizjes Vetëvendosje, psikologut Fitim Uka. /Gazeta Shneta/