Organizata Botërore e Shëndetësisë ka rekomanduar suspendimin e përdorimit të hidroksiklorokinës për shkak të efekteve anësore në çrregullimin e ritmit të zemrës tek disa pacientë. Deri më tani janë tre vende evropiane që kanë respektuar këtë rekomandim, Franca, Italia dhe Belgjika.
Profesori Salih Ahmeti në Klinikën Infektive ka bërë të ditur se janë duke shqyrtuar këtë rekomandim të OBSH-së, të cilin e ka quajtur të vonuar pasi tashmë jemi në përfundim të pandemisë, shkruan Gazeta Shneta.
Ahmeti ka thënë se hirdroksiklorokina është një bar jo i ri, i cili është përdorur me vite me radhë dhe përdoret edhe tash jo vetëm te Covidi por edhe të sëmundjet tjera.
“Te Covidi ne e japim shumë shkurt, për 1 javë ose 10 ditë. Ndërsa tek sëmundje tjera te artriti reumatik etj. përdoret me muaj të tërë pa efekte anësore. Ne i mirëpresim sugjerimet e OBSH-së edhe pse të vonuara, ne ashtu kështu jemi në përfundim të epidemisë dhe ne e kemi dhënë këtë bari sikurse e kanë dhënë shumica e vendeve të botës, pasi ka qenë i aprovuar edhe nga FDA”, ka deklaruar Ahmeti.
Ai ka thënë se efektet anësore të këtij medikamenti, sikurse edhe barnave tjera, janë përcjellë dhe monitoruar vazhdimisht edhe nga ekipet tjera mjekësore.
“Natyrisht se kemi pas konsiderata për efektet e mundshme anësore dhe ato i kemi monitoruar në mënyrë permantente dhe nuk kemi lejuar që të vijnë në shprehje sepse kemi bërë monitorim të tillë në mënyrë ekipore me përkujdesje edhe të kardiologëve. Secili bar, qoftë edhe vitamina C, kanë efekte anësore dhe prandaj janë ekipet mjekësore për t’i eliminuar ato dhe bari të jepet në mënyrë indikativë”.
Infektologu ka treguar se aktualisht janë tre pacientë të cilët janë në përfundim të trajtimit me këtë medikament. “I kemi tre pacientë të cilët veçse e kanë përfunduar tretmanin me klorokinë dhe fatbardhësisht rastet tona të cilat kanë qenë të monitoruara shumë mirë, nuk kemi pas efekte anësore. Ne do të veprojmë sikurse vendet tjera të botës, e kemi zyrën e OBSH-së këtu dhe do të veprojmë në harmoni me gjetjet aktuale”, ka thënë Ahmeti.
Ai ka konfirmuar se shumica e pacientëve, të gjitha rastet indikative që kanë pas nevojë janë trajtuar me këtë medikament dhe mund të them se nuk kemi pas efekte anësore.
Kujtojmë se në Kosovë janë prekur nga koronavirusi 1048 pacientë, prej të cilëve 801 janë shëruar ndërsa të paktën 30 kanë ndërruar jetë, shumcia prej të cilëve në Klinikën Infektive. /Gazeta Shneta/