Kryeministri Albin Kurti iu ka bërë thirrje qytetarëve që të imunizohen me vaksinat kundër Covid-19, në kohën kur vendi rrezikohet të përballet më një valë të radhës nga varianti Delta.
Ndonëse Kurti ka lavdëruar qeverinë e tij për uljen e rasteve me Covid, ai ka thënë se vendi rrezikohet nga përhapja e variantit Delta.
“Përballë tij mburoja për secilin prej nesh është vaksina, kurse për të gjithë së bashku vaksinimi masiv. Vaksinat i kemi siguruar. Ato janë të sigurta. Kosova është vendi i vetëm në rajon që po përdorë vetëm vaksinat e aprovuara nga Agjencia Federale e Barnave të Shteteve të Bashkuara të Amerikës dhe Agjencia Evropiane e Barnave, pra Pfizer dhe Astrazeneca. Tani mund të vaksinohen të gjithë qytetarët mbi moshën 18 vjeç dhe mund të zgjedhin vaksinën që dëshirojnë ta marrin”, ka deklaruar Kurti.
Ai iu ka bërë thirrje qytetarëve që të regjistrohen në platformën eKosova dhe të caktojnë terminin për vaksinim.
“Me kujtimin për të dashurit që humbëm nga pandemia, të kujdesemi për veten dhe njerëzit tonë të afërm duke u vaksinuar. Të përgjegjshëm individualisht dhe për njëri-tjetrin, bashkë ia dalim”, ka shkruar ai. /Gazeta Shneta/