Shërimi jashtë vendit fatkeqësisht në Kosovë është shndërruar në biznes dhe mundësi mashtrimi.
Policia e Kosovës ka njoftuar se është në kërkim të dy personave, Mexhid Krasniqi 35-vjeç dhe Muhamet Gashi 22-vjeç, të cilët kanë mashtruar qytetarët duke iu kërkuar para për shërim jashtë vendit, shkruan Gazeta Shneta.
Krasniqi dhe Gashi dyshohet se kanë përdorur informata të rrejshme kinse për persona të sëmurë që kanë nevojë për shërim jashtë vendit, duke kërkuar para në emër të tyre nga qytetarët.
“Personat e dyshuar përmes llogarive bankare, kanë përfituar shuma parash duke përdorur rrjetet sociale në internet dhe portalet, (me dokumente që dyshohet të jenë të falsifikuara), për të kërkuar ndihmë për shërim jashtë vendit, për persona të ndryshëm”, thuhet në njoftimin e Policisë.
Kjo nuk është hera e parë që persona të dyshuar kanë mashtruar qytetarët në emër të njerëzve që kanë nevojë për shërim jashtë vendit.
Më poshtë gjeni njoftimin e plotë:
Identifikohen dy persona të dyshuar për disa raste të mashtrimeve
Prishtinë, 24 shtator 2021 – Referuar disa rasteve të mashtrimit të raportuara gjatë këtij viti (prill, maj, qershor), Drejtoria Rajonale e Policisë së Prishtinës, respektivisht Njësia e hetimeve të Përgjithshme, kanë ndërmarrë të gjitha masat policore në drejtim të hetimit, identifikimit, marrjes e përpunimit të informacioneve të rëndësishme që lidhen me rastet në fjalë:
Veprimet e lartcekura policore kanë rezultuar me identifikimin e të dyshuarve:
– Mexhid Krasniqi, 35 vjeç, mashkull, shtetas i Republikës së Kosovës dhe
-Muhamet Gashi, 22 vjeç, mashkull, shtetas i Republikës së Kosovës,
për të cilët dyshohet se janë të përfshirë në kryerjen e rasteve të mashtrimeve që po hetohen nga ana e policisë.
Mbështetur në rezultatet e deritanishme të hetimit, policia ka ngritur dyshimin e bazuar se mashtrimet mund të kenë ndodhur në vazhdimësi për një periudhë të gjatë kohore.
Personat e dyshuar përmes llogarive bankare, kanë përfituar shuma parash duke përdorur rrjetet sociale në internet dhe portalet, (me dokumente që dyshohet të jenë të falsifikuara), për të kërkuar ndihmë për shërim jashtë vendit, për persona të ndryshëm.
Personat e dyshuar aktualisht ndodhen në arrati dhe janë shpallë në kërkim nga ana e policisë.
Andaj inkurajojmë të gjithë ata që kanë informacione lidhur me vendndodhjen e tyre, apo çfarë do lloj informacioni tjetër që do t’i kontribuonte arrestimit të tyre, t’ ia kalojnë ato policisë përmes linjës 192, apo në çfarëdo forme tjetër.