Dafina Gexha-Bunjaku është emëruar javën e kaluar në pozitën e ushtrueses së detyrës së ministres së Shëndetësisë, pas dorëheqjes së Arben Vitisë pasi ky i fundit është kandidat për kryetar të Prishtinës.
Gexha-Bunjaku paraprakisht ka qenë e emëruar në pozitën e zëvendësministres që nga ardhja e Qeverisë Kurti në pushtet në mars të këtij viti. Për vitin 2020 ajo ka deklaruar katër burime të të ardhurave, IKSHPK 7800 euro, shtesa 1750 euro, Bordi i AUV-it 1069 euro dhe OJQ “Integra” 162 euro, shkruan Gazeta Shneta.
Gexha-Bunjaku ka deklaruar një apartament në vlerë 65 mijë euro në pronësi të përbashkët, si dhe një shtëpi në emër të prindit në vlerë 100 mijë euro.
Epidemiologia ka deklaruar rreth 30 mijë euro para të gatshme në llogaritë e saj në bankat komerciale, ndërsa mbi 6 mijë euro në emër të bashkëshortit dhe fëmijëve.
Bashkëshorti i saj ka një biznes të quajtur “Pebasys LLC” në vlerë 10 mijë euro. Gexha-Bunjaku poashtu ka deklaruar obligime financiare në vlerë 446 euro dhe në emër të bashkëshortit 4,124 euro. /Gazeta Shneta/