Administrata Amerikane e Ushqimit dhe Barnave (FDA), miratoi të mërkurën përdorimin emergjent të pilulës së re antivirale të kompanisë Pfizer të ashtuquajturin Paxlovid te njerëzit që janë në rrezik të lartë për COVID-19 të rëndë. Është trajtimi i parë i miratuar për COVID-19 që synohet të merret në shtëpi.
“Autorizimi i sotëm prezanton trajtimin e parë për COVID-19 që është në formën e një pilule që merret nga goja – një hap i madh përpara në luftën kundër kësaj pandemie globale,” tha Dr. Patrizia Cavazzoni, drejtore e Qendrës së FDA për Vlerësimin dhe Hulumtimin e Barnave.
“Ky autorizim ofron një mjet të ri për të luftuar COVID-19 në një kohë vendimtare të pandemisë ndërsa shfaqen variante të reja.”
Pfizer fillimisht kërkoi autorizim emergjent në mes të nëntorit dhe më vonë njoftoi rezultate mahnitëse të provës përfundimtare mbi fuqinë e Paxlovid për t’u mbrojtur kundër COVID-19 të rëndë. Në atë provë, pilula, e marrë për pesë ditë, uli shanset për shtrimin në spital dhe vdekjen me gati 90 për qind te njerëzit me rrezik të lartë. Paxlovid duhet të merret brenda ditës për tre here në një kohëzgjatje për pesë ditë nga fillimi i simptomave, tha FDA.
Paxlovid është një kombinim i ritonavirit dhe një molekule të re të zhvilluar posaçërisht për të çaktivizuar sindromën e rëndë akute të frymëmarrjes. Bari ka disa kufizime. Ritonavir mund të ndërveprojë me shumë barna të marra zakonisht dhe këto rreziqe mund të kenë nevojë të menaxhohen nga mjekët dhe farmacistët, tha FDA.
Efektet anësore të mundshme të Paxlovid përfshijnë dobësimin e ndjenjës së shijes, diarrenë, presionin e lartë të gjakut dhe dhimbjet e muskujve.
Përdorimi i Paxlovid tek njerëzit me infeksion HIV të pakontrolluar ose të padiagnostikuar mund të shkaktojë rezistencë ndaj barnave HIV-1. Ritonavir mund të shkaktojë dëmtim të mëlçisë, kështu që duhet treguar kujdes kur u jepet pacientëve me sëmundje të mëlçisë, shtoi agjencia. Paxlovid gjithashtu nuk rekomandohet te pacientët me dëmtim të rëndë të veshkave. Në pacientët me dëmtim të moderuar të veshkave, nevojitet një dozë e reduktuar e bari Paxlovid, njoftoi FDA. /Gazeta Shneta/