Virusi covid ka rrezikuar tashmë një pjesë të madhe të shoqërisë, e me përhapjen e varinatit më të ri Omicron, numri i të infektuarve është rritur edhe në Kosovë.
Në mesin e të prekurave nga ky virus janë edhe gratë shtatzëna dhe lehonat. Në një intervistë për Gazeta Shneta, drejtori i Klinikës Gjinekologjike dhe Obsterike, Jakup Ismajli ka thënë se 22 pacientet e hospitalizuara deri sot ishin pozitive me Covid-19.
“Për momentin janë 22 paciente të hospitalizuara por po presim që të lirojmë disa prej tyre pasi kanë kryer procesin e lindjes dhe kanë dal me test Rapid negativ”, ka thënë Ismajli.
Ndonëse Ministria e Shëndetësisë po bën thirrje të vazhdueshme për vaksinim, ende ka një pjesë të njerëzve që nuk kanë marrë as dozën e parë të vaksinës.
Sipas Ismajlit, 22 pacientet të cilat ishin të hospitalizuara ishin të pavaksinuara, prandaj ai këshillon që të gjithë të vaksinohen që të parandalojnë komplikimet nga virusi.
“Me vetë faktin që të gjitha pacientet e infektuara kanë qenë të pavaksinuara tregon që mundësia e infektimit është më e vogel të pacientet që janë të vaksinuara, po ashtu edhe komplikimet, problemet nga Covidi janë shumë më të lehta”, shtoi ai për Gazeten Shneta.
Tutje, Ismajli tregon që gjatë kësaj kohe edhe disa nga stafi kanë qenë të infektuar, gjithsesi klinika nuk ka pasur mungesë stafi pasi që të infektuarit nuk kanë qenë në përiudha të njejta kohore.
“Kanë qenë tre gjinekolog, një specializant dhe diku mbi 20 infermier”, u shpreh ai.
Sipas drejtorit, i tërë stafi është i vaksinuar edhe me dozën e dytë dhe masat janë duke u respektuar në bashkëpunim më qytetarët dhe institucionet për të luftuar virusin COVID.
Kujtojmë që në javën e fundit numri i të infektuarve është rritur me një hap të shpejtë, duke quar numrin e të infektuarve në 18 mijë./Gazeta Shneta/