Komuna e Podujevës më 21 prill të këtij viti ka iniciuar një procedurë tenderuese për barna dhe reagensa për Qendrën Kryesore të Mjekësisë Familjare në vlerë 700 mijë euro.
Megjithatë për këtë procedurë janë ngritur dyshime nga ofertuesit për favorizim të një operatori ekonomik. Kjo për arsye se komuna ka vendosur që autorizimi i kërkuar për reagensat e laboratorit, të jetë obligativ edhe në ofertën për barna, shkruan Gazeta Shneta.
Me këtë tender Komuna e Podujevës synon të blejë 222 artikuj, prej të cilëve 16 janë reagensa për laborator. E autorizimi nga prodhuesi ose përfaqësuesi i prodhuesit po kërkohet për të gjithë dosjen, pasi komuna i ka vendosur të gjithë artikujt në vetëm një lot.
Kjo gjë ka ngritur dyshime për favorizim pasi vetëm një kompani e mban autorizimin për reagensa.
Gazeta ka kërkuar sqarime nga komuna e Podujevës lidhur me këtë procedurë. Ata thonë se të gjitha produktet janë të një kategorie dhe ndarja në lote e rrezikon furnizimin.
“AK i ka shqyrtuar me kujdes duke u konsultuar edhe me njësinë kërkuese dhe ka konsideruar se gjitha këto janë produkte të një kategorie dhe mundësia e ndarjes në lote rrezikon shërbimet që ofrohen në QKMF, anulimin e shumicës së produkteve të mbesin pa kontratë pasi ka produkte me sasi shumë të vogël”, arsyeton Komuna e Podujevës në një përgjigje për Gazetën Shneta.
Nga komuna poashtu theksojnë se nuk ka asnjë favorizim apo diskriminim të Operatorëve Ekonomik.
“Autoriteti Kontraktues ka kërkuar deklaratë nga prodhuesi se produktet janë kompatibile për aparatet që posedon QKMF dhe me këtë nuk ka bërë asnjë kufizim pasi AK ka kërkuar një deklaratë nga prodhuesi dhe një çertifikatë të specialistit nga prodhuesi i aparateve pasi që ndjeshmëria e këtyre pajisjeve është shumë specifike, këto janë aparate të cilat duhet të kalibrohen dhe testohen në vazhdimësi nga stafi profesional dhe i specilaizuar”, thuhet në përgjigjen e komunës. /Gazeta Shneta/