Pijet energjike mund t’ju bëjnë të lodhur për shkak të kafeinës dhe sheqerit të tepërt, dhe ato lehtë mund t’ju prishin gjumin.
Mes tjerash, pijet energjike janë menduar të jenë gjëja më e mirë për t’u konsumuar kur duhet të zgjoheni – në fund të fundit quhen ‘pije energjike’.
Ato kanë për qëllim të përmirësojnë performancën tuaj fizike, t’ju bëjnë më vigjilentë dhe në përgjithësi t’ju përmirësojnë rreth përqëndrimit, shkruan burimi Rise Science përcjell Gazeta Shneta.
Por shumë shpesh, ato mund t’ju bëjnë të ndiheni edhe më të lodhur se para se të pini një.
Pijet energjike përbëhen nga disa përbërës të krijuar për t’ju bërë të ndiheni më të zgjuar dhe vigjilentë.
Kafeina
Ne të gjithë e dimë dhe e duam kafeinën, dhe ajo funksionon duke na ndaluar përkohësisht të ndjehemi të përgjumur.
Adenozina është një kimikat që grumbullohet natyrshëm në trupin tuaj gjatë gjithë kohës që jeni zgjuar duke vepruar si një neurotransmetues, duke shtypur sistemin nervor qendror dhe përfundimisht duke arritur nivele që ju bëjnë të ndiheni të përgjumur.
Kafeina hyn dhe lidhet me receptorët e adenozinës në trurin tuaj, kështu që kimikati nuk mund të funksionojë tek ju dhe ju nuk i ndjeni efektet e tij të përgjumjes.
Shumë pije energjike përmbajnë 50 deri në 160 miligramë kafeinë, por disa mund të përmbajnë edhe më shumë se 500 mg kafeinë. Për ta krahasuar atë me kafenë, një kafe e vetme ekspres ka rreth 63 mg kafeinë, ndërsa një filxhan kafe e çastit varion nga 30 në 90 mg.
Sheqeri
Një gjë që i veçon pijet energjike nga pijet e tjera me kafeinë është përmbajtja e sheqerit dhe mund ta shihni këtë në etiketë si shurup misri me fruktozë të lartë ose saharozë.
Gjithçka varet nga marka, por një kanaçe me pije energjike mund të përmbajë rreth 54 gram sheqer, ose rreth 13 lugë çaji sheqer.
Administrata Amerikane e Ushqimit dhe Barnave (FDA), rekomandon konsumimin e jo më shumë se 50 gram sheqer të shtuar në ditë, bazuar në një dietë me 2000 kalori ditore.
Shoqata Amerikane e Zemrës, megjithatë, rekomandon marrjen e sheqerit në vetëm 36 gramë (nëntë lugë çaji) në ditë për burrat, ose vetëm 25 gramë (gjashtë lugë çaji) në ditë për gratë.
Si ju jep sheqeri një shpërthim energjie? Sheqeri shpërbëhet nga trupi në glukozë, e cila më pas udhëton përmes gjakut tuaj në muskujt dhe organet tuaja ku shndërrohet në energji.
Konsumimi i sheqerit gjithashtu nxit trurin të prodhojë hormonet dopaminë dhe serotonin, kështu që humori juaj përmirësohet së bashku me nivelet tuaja të energjisë.
Përbërës të tjerë
Ka pak përbërës të tjerë që hyjnë në pije energjike, duke përfshirë vitaminat B, ëmbëlsuesit artificialë, taurinën (një aminoacid) dhe ginsengun (një suplement bimor që mund të rrisë energjinë dhe kujtesën).
Ekziston edhe guarana, një bimë braziliane me origjinë nga Amazona, e njohur për vetitë e saj të rritjes së energjisë.
Në fakt, farat e guaranës përmbajnë më shumë kafeinë se çdo bimë tjetër në botë, dhe bima gjithashtu përmban teobrominë dhe teofilinë, të cilat janë stimuluese. /Gazeta Shneta/