SHSKUK dje ka hapur sallat e reja të Klinikës së Ortopedisë në QKUK pa pëlqimin sanitar dhe kjo po del të jetë në kundërshtim me ligjin.
Ligji për Inspektoratin Sanitar, konkretisht Neni 14 dhe Neni 16 flasin për mbikëqyrjen e këtij organi mbi institucionet spitalore. Neni 16 thotë se “Inspektorati Sanitar i Kosovës jep pëlqimin sanitar për lokacionet e propozuar të objekteve të kompanive ushqimore, ujësjellësve, të objekteve spitalore, pompave të karburanteve, të objekteve dhe të stabilimenteve për lëshuarjen dhe mënjanimin e ujërave të hedhura dhe për deponimin e mbeturinave”.
Por menaxhmenti i SHSKUK-së dhe Klinika e Ortopedisë nuk e përfillën këtë akt ligjor dhe i hapën sallat e operacionit pa marr fare pëlqimin nga Inspektorati Sanitar.
Këtë e kanë konfirmuar edhe nga Inspektorati përmes një përgjigje nga zëdhënësi i AVUK-ut Lamir Thaçi.
“Klinika e Ortopedisë në kudër të SHSKUK-së ende nuk e ka kompletuar me dokumentet e kërkuara aplikimin për pëlqim sanitar. Ne si autoritet jemi zotuar qe ne momentin e kompletimit të aplikimit do të dërgojmë ekip inspektuese për të bërë vlerësimin sipas kushteve ligjore. Pas këtij inspektimi vlerësues të kushteve teknike sanitare dhe higjienike lëshohet vendimi për pëlqim sanitar (dhënia apo jo e pëlqimit gjithmonë varet nga vlerësimit i ekipit profesional inspektues)”, ka deklaruar Thaçi.
Gazeta e ka pyetur edhe SHSKUK-në në lidhje me këtë çështje pse janë hapur sallat pa pëlqimin e Inspektoratit, por të njëjtit nuk kanë kthyer përgjigje. /Gazeta Shneta/