Zeqir Himaj nga Deçani të cilit mjekët e QKUK-së ia shpëtuan dorën e prerë, ka falënderuar stafin mjekësor dhe Zotin për gjendjen e tij të mirë shëndetësore.
Zeqir Himaj, 27-vjeç, para dy javësh ishte duke punuar në punëtorinë e tij private në Deçan. Gjatë procesit të punës ai kishte shkaktuar një vetaksident nga i cili e dora e tij pothuajse ishte prerë e gjitha, shkruan Gazeta Shneta.
Himaj ka folur në një intervistë për Gazetën Shneta ku ka treguar se ndonëse e kishte prerë parakrahun, ai nuk e kishte humbur vetëdijen për asnjë moment.
“Unë jam kanë me vetdije të plotë. Vet e kam shtrëngu dorën dhe kam qenë vet duke pritur në rrugë për me ardh me më marr vetura”, ka thënë Himaj.
Ai ka thënë se tash është në gjendje të mirë shëndetësore dhe pas katër javësh do t’i nënshtrohet një operacioni tjetër për qepjen e nervave nga neurokirurgët në QKUK.
“Falënderoj Zotin dhe stafin mjekësor”, ka thënë Himaj.
“Respekt për të gjithë ekipin e kirurgjisë vaskulare të QKUK-së për kujdesin gjatë intervenimit dhe qëndrimit në spital. Respekt për Dr. Lulzim Vokrri kirurg vaskular. Falënderoj edhe qendrën e mjekësisë familjare në Deçan për dhënien e ndihmës së parë dhe Spitalin e Pejës për transferin në QKUK”, ka deklaruar Himaj.
Nga QKUK kanw njoftuar se mjekët kanë kryer operimin tek pacient i moshës 27 vjeç, duke i realizuar dy bypasse (urëzime), në pjesën më distale të arteries radiale dhe ulnare, (arterie që ushqejnë dorën me gjak).
“Si graft për rekostrukcion të arterieve të lëndura, ekipa përdori venën sipërfaqësore të pacientit; (Vena saphena magna). Po ashtu, ekipa operative, kishte përkujdesur dy venat radiale dhe ulnare dhe kishte bërë hemostazë korrekte”, thuhet në njoftim.
Intervenimi është kryer nga mjekët: Dr. Lulzim Vokrri dhe specializantja Marigona Haziri nga Kirurgjia Vaskulare; Dr. Gani Jashanica, Dr.Ermir Shabani dhe Dr.Naim Bajrami nga Ortopedia; Dr. Sanije Abazi dhe Dr. Masar Azemi nga Kirurgjia Plastike; Dr. Armend Kërveshi dhe Dr. Flamur Hasimi nga Neurokirurgjia; Dr. Nexhmije Jonuzi dhe Alban Gjobalaj nga Anestezioni. /Gazeta Shneta/