Prokurori i Odës së Mjekëve të Kosovës nesër do të nis hetimet në rastin e Kardiokirurgjisë në QKUK.
Kryetari i Odës së Mjekëve të Kosovës Pleurat Sejdiu, e ka konfirmuar për Gazetën Shneta se ka kërkuar nga Prokurori i kësaj organizate, që të nis hetimet në rastin e Kardiokirurgjisë.
“Po kam kërku nga prokurori i Odës me fillu hetimet. Zyrtarisht do të fillojnë nesër ndaj mjekut që ka kryer operacionin dhe ndaj drejtorit të Klinikës”, ka deklaruar Sejdiu.
Hetimet e prokurorit të OMK-së do të bëhen pas raportimit të Gazetës Shneta për rastin e një pacienti në Klinikën e Kardiokirurgjisë.
Kardiokirurgu Kushtrim Shala e shpërndau dje një postim duke thënë se kanë pasur sukses në intervenimin e rrallë të quajtur “David”, tek një pacient i moshës 63-vjeçare. Por Gazeta më vonë mori vesh se pacienti kishte ndërruar jetë pas disa orësh.
Drejtori i Klinikës së Kardiokirurgjisë Rifat Brahimaj, ka deklaruar se mjeku që ka kryer këtë operacion nuk është kompetent profesionalisht pasi sipas tij ai ka vështirësi edhe në procedura standarde. /Gazeta Shneta/