Qeveria e Kosovës e ka shkarkuar kirurgun Isuf Zekaj nga Bordi Drejtues i Shërbimit Spitalor Klinik Universitar.
Qeveria e Kosovës në mbledhjen e sotme korresponduese e ka shkarkuar kirurgun Isuf Zekaj nga pozita e anëtarit të Bordit Drejtues të SHSKUK-së, shkruan Gazeta Shneta.
“Qeveria e Republikës së Kosovës ka zhvilluar mbledhjen e radhës korresponduese, në të cilën mori vendim për shkarkimin e anëtarit të Bordit Drejtues të Shërbimit Spitalor dhe Klinik Universitar nga Spitali i Përgjithshëm i Vushtrrisë, Dr. Isuf Zekaj”, thuhet në njoftimin e Qeverisë.
Shkarkimi i Zekajt vjen pas arrestimit të tij nga Policia e Kosovës nën dyshimin për kryerjen e veprës “marrje ryshfeti” në Spitalin e Vushtrrisë. Ai gjendet në arrest shtëpiak me vendim të Gjykatës Themelore në Mitrovicë.
Zekaj u arrestua javën e kaluar bashkë me dy kolegë të tij, Arsim Latifaj dhe Ekrem Sefiu. Të tre dyshohen për korrupsion në lidhje me veprën “marrje ryshfeti”. Tre kirurgët janë suspenduar nga puna në Spitalin e Vushtrrisë.
Krejt kjo ndodhi pas raportimit të Gazetës Shneta e cila publikoi disa video-dëshmi të pacientëve të cilët tregojnë se si iu dhanë para mjekëve për të kryer operacionet. /Gazeta Shneta/
Tre kirurgë dyshohet se morën para nga pacientët për të kryer operacionet në Spitalin e Vushtrrisë