Qeveria e Kosovës ka miratuar sot kërkesën e Ministrisë së Shëndetësisë për pagesën e 580 specializantëve me vetëfinancim prej datës 1 janar 2023 deri më 31 dhjetor.
580 specializantët vetëfinancues do të përfitojnë pagesë të njëjtë sikurse specializantët e tjerë në sektorin e shëndetësisë, ka thënë sot ministri i Shëndetësisë, Arben Vitia.
Në arsyetimin e tij, ministri Arben Vitia ka thënë se kjo pagesë është stimulim për të luftuar ikjen e kuadrove shëndetësore.
“Specializantët të cilët i nënshtrohen shkollimit profesional dallohen sipas kategorive të financimit me buxhet të ministrisë dhe të komunave e institucioneve private apo me vetëfinancim. Numri i kuadrove profesionale shëndetësore në vend është shumë i ulët në krahasim me disa vende të Organizatës për Zhvillim dhe Bashkëpunim Ekonomik dhe vendeve të rajonit. Sipas analizave që konstatojnë numrin e të vogël për kokë banori, ngrihen shqetësime për sa i përket qasjes në shërbime shëndetësore të popullatës”, ka thënë ai duke shtuar se këtë pagesë e konsiderojnë prioritet.
