Ministria e Shëndetësisë nuk ka treguar se cilat janë gjetjet e Inspektoratit Shëndetësor në rastin e poliklinikës “Aorta” në Ferizaj ku vdiq një grua 41-vjeçare.
Inspektorati Shëndetësor ka kryer një inspektim të hënën për rastin e vdekjes së gruas 41-vjeçare në poliklinikën “Aorta” në Ferizaj pasi kishte kryer një procedurë tek gjinekologu Heroid Arifi, shkruan Gazeta Shneta.
MSH i ka thënë Gazetës se raporti i inspektimit është “në procedurë të përpilimit nga inspektorët e rastit dhe pas përfundimit te këtyre raporteve do të njoftoheni me të gjeturat dhe masat e marra nga inspektorati”.
Megjithatë Gazeta Shneta ka mësuar nga burime se Inspektorati nuk ka arritur të gjejë asgjë lidhur me rastin pasi stafi mjekësor nuk e kishin evidentuar në protokoll rastin e të ndjerës. Tani ISH janë në pritje të një deklarate nga mjeku gjinekolog.
Inspektorati kishte shkuar në këtë institucion rreth 48 orë pasi kishte ndodhur rasti. Ata janë arsyetuar se nuk janë ftuar nga Prokuroria dhe nuk kanë pasur informacion për rastin i cili kishe ndodhur të shtunën derisa Inspektorati ka kryer inspektim të hënën.
Sipas raportimit të mediave mjeku gjinekolog kishte deklaruar në polici se e ndjera kishte pasur dhimbje gjoksi. Në momentin e ngjarjes kishte qenë i pranishëm edhe anesteziologu Muhamet Fazliu, i cili poashtu sipas raportimit të mediave kishte qenë rastësisht aty.
Rasti po hetohet nga Prokuroria në Ferizaj. /Gazeta Shneta/