Një pikë e vogël në faqen e Christy Staats ishte vetëm 0.65 milimetra ose 0.025 inç dhe ishte pothuajse e padukshme për syrin e njeriut.
Por me ndihmën e teknologjisë më të fundit jo-invazive, një dermatolog nga Oregon Health & Science University dhe një ekip multidisiplinar konfirmuan se njolla ishte me të vërtetë një melanoma, lloji më i rrezikshëm i kancerit të lëkurës, shkruan Medical Xpress përcjell Gazeta Shneta.
Për të identifikuar këtë mikro-kancer të lëkurës, Dr. Alexander Witkowski, një asistent profesor i dermatologjisë në Shkollën e Mjekësisë Oregon Health & Science University, përdori një kombinim të dermoskopisë – një ekzaminim i lezioneve të lëkurës me një dermatoskop – dhe mikroskopin konfokale reflektuese i cili është një mjet imazherie që ndihmon mjekët të monitorojnë dhe diagnostikojnë lezionet e lëkurës pa pasur nevojë për prerje në lëkurë.
Ndërsa kolegët e tij, Dr. Joanna Ludzik, Dr. Jina Chung, Dr. Sancy Leachman dhe Claudia Lee ndihmuan në konfirmimin e diagnozës duke zbatuar teknika shtesë të ngjyrosjes dhe testimit molekular.
Kapja e hershme e këtij kanceri të lëkurës i dha ekipit të Oregon Health & Science University, Rekordin Botëror Guinness për “Kancerin më të vogël të zbuluar të lëkurës“.
Më 1 maj, një gjyqtar nga Rekordet Botërore Guinness erdhi në Oregon Health & Science University për t’i dhënë secilit anëtar të ekipit një certifikatë për rekordin e tyre të sapo-fituar.
Hulumtimi i lidhur është publikuar në revistën “Dermatology Practical & Conceptual”.
Ky kancer i lëkurës i vërtetuar shkencërisht është një mikro-melanoma, një lloj kanceri që gjendet ekskluzivisht në shtresën e sipërme të lëkurës.
Dr. Witkowski thotë se kjo është e rëndësishme sepse “u gjet përpara se të kishte mundësi të përhapej në pjesë të tjera të trupit”.
Shoqata Amerikane e Kancerit, vlerëson se në vitin 2023, rreth 97,610 melanoma të reja do të diagnostikohen në Shtetet e Bashkuara.
Melanoma përbën vetëm rreth 1% të kancereve të lëkurës në përgjithësi, por shkakton një shumicë të madhe të vdekjeve nga kanceri i lëkurës. /Gazeta Shneta/