Ministria e Shëndetësisë sërish ia ka dhënë një tender 716 mijë Euro kompanisë “Infosoft Systems”, gjysma e së cilës është në pronësi të kompanisë nga Shqipëria “Investment Joti Infosoft Group”. “Infosoft Systems” në vitin 2018 pati përfituar një tender mbi 4.6 milionë Euro për furnizim me pajisje “Zero Client” të SISH-it të cilat nuk u funksionalizuan deri në vitin 2022. Këtyre pajisjeve iu skadoi afati i garancionit sivjet. Tenderi 716 mijë eurosh të cilin e fitoi kompania “Infosoft” është për mirëmbajtje të pajisjeve “Zero Client”
Ministria e Shëndetësisë para disa ditësh ka publikuar vendimin me të cilin njofton se ka shpërblyer me tender kompaninë “Infosoft Systems” në vlerë prej 716 mijë Euro. Tenderi është për mirëmbajtje të 70 për qind të pajisjeve hardwerike të Sistemit Informativ Shëndetësor, shkruan Gazeta Shneta.
E njëjta kompani, e cila 52.50% është në pronësi të një personi fizik ndërsa 47.5% është në pronësi të kompanisë nga Shqipëria “Investment Joti Infosoft Group”, në vitin 2018 kishte fituar një tender tjetër milionësh për furnizim me pajisje të SISH-it.
MSH e kishte shpërblyer këtë kompani me tender në vlerë mbi 4.6 milionë euro për “Zgjerim të infrastrukturës ekzistuese për SISH”. Me këtë tender parashihej blerja e qindra pajisjeve hardwerike të njohura si “Zero Clients” për njësitë e Shërbimit Spitalor Klinik Universitar dhe për Kujdesin Parësor Shëndetësor nëpër komunat e Kosovës.
Por shumica nga këto pajisje nuk u shpërndan nëpër institucione deri në vitin 2022. Mijëra sosh ishin vendosur në vitin 2020 në një hapësirë në Qendrën e Telemjekësisë në QKUK dhe nuk u përdorën asnjëherë. Të njëjtat kishin filluar të shpërndahen tek pas një kërkese të ish-ministrit Rifat Latifi për ta liruar këtë hapësirë të Telemjekësisë pasi aty parashihej të bëhej një Qendër e Simulimit.
Këtë e kishte konfirmuar vet MSH duke thënë se në atë depo kanë qenë rreth 1 mijë pajisje “Zero Client” të cilat i kishin kushtuar buxhetit të shtetit 490 Euro për një copë. MSH ishte arsyetuar në atë kohë se këto pajisje nuk kanë mundur të shpërndahen për shkak të pandemisë, ndonëse kontrata ishte nënshkruar në vitin 2018, pra rreth dy vjet para se Covid-19 të shfaqej në Kinë për herë të parë.
Këto pajisje ishin dorëzuar në fillim të vitit 2020 dhe sipas kontratës kishin garancion 3 vite, që i bie se tanimë atyre iu ka skaduar afati i garancionit.
Tani meqë bëhet fjalë për të njëjtat pajisje “Zero Client” në tenderin 716 mijë Eurosh për mirëmbajtje dhe garancion, dhe pas interesimit të Gazetës Shneta për këtë çështje, MSH ka njoftuar se drafti i kontratës ende nuk është nënshkruar dhe se po analizohen të gjitha çështjet lidhur me këtë tender.
MSH ka njoftuar se Sekretari Naim Bardiqi ka ngritur këto dilema në lidhje me këtë tender në Komisionin Rregullativ të Prokurimit Publik si dhe ka kërkuar asistencë nga programet të cilat e ndihmojnë MSH-në në këtë fushë.
“Sekretari i Përgjithshëm i Ministrisë së Shëndetësisë i ka pranuar draft kontratën nga Divizioni i Prokurimit për nënshkrim. Disa nga çështjet që ju i keni ngritur dhe të tjera janë po ashtu dilema të Sekretarit për të cilat ka kërkuar informacione shtesë nga njësia e kërkesës. Po ashtu është kërkuar interpretim/opinion nga Komisioni Rregullativ i Prokurimit Publik në lidhje me kompetencat e Sekretarit në ndërhyrje në ato procedura ku ka dilema, nëse i lejohet të njëjtit të ndërmarrë veprime apo nëse kjo është kompetencë ekskluzive e divizionit të prokurimit”.
“Për më tepër për të njëjtin aktivitet të prokurimit është kërkuar asistencë nga programet të cilat e ndihmojnë Ministrinë e Shëndetësisë në prokurim publik. Për momentin, Sekretari nuk ka vendosur se si do të veproj tutje me këtë kontratë, por do ti përmbahet këshillave që i pranon nga KRPP dhe këshilltarët për çështjet e prokurimit publik”, thuhet në përgjigjet e MSH-së.
MSH nuk ka sqaruar më shumë detaje edhe për pyetjet e Gazetës pse nuk ka pasur oferta tjera në këtë tender dhe pse është shpërblyer një operator meqë nuk ka pasur ofertues të tjerë.
Gazeta ka kërkuar sqarime edhe nga kompania “Infosoft Systems”. Redaksia që disa ditë është munduar të bie në kontakt me këtë kompani, e cila ndonëse fiton tendera milionësh çuditërisht nuk e ka në funksion asnjë email dhe as një numër telefoni.
Pas disa tentimeve, Gazeta ka siguruar një email të kësaj kompanie nga dokumentet e prokurimit ku janë dërguar pyetjet para dy ditësh por nga “Infosoft Systems” nuk kanë kthyer përgjigje. /Gazeta Shneta/
