Qendra Klinike Universitare, viteve të fundit është braktisur nga profesionistë shëndetësor, disa nga të cilët kanë zgjedhur të punojnë në klinikat jashtë Kosovës, e disa prej tyre dhe në klinikat private brenda vendit.
E gjithë kjo si pasojë e kushteve dhe pagave të ulëta, të cilat kanë qenë për profesionistët shëndetësor. Por siç duket gjendja ka ndryshuar dhe se mjekët dalëngadalë po i kthehen QKUK-së.
Së fundi ka interesim të kthimit të mjekëve në QKUK. Shërbimi Spitalor Klinik dhe Universitar (SHSKUK) tashmë ka hapur konkursin për 4 mjekë specialistë të anestezionit, konkurs ky i cili është i hapur që nga data 21 qershor.
Tre anesteziolog pritet që së shpejti të kthehen nga institucionet private në QKUK. Këtë e konfirmoi për “Indeksonline” dhe drejtori i Klinikës së Anestezionit në QKUK Gazmend Spahija.
” E kemi hapur konkursin dhe se presim që tre anesteziolog të kthehen në QKUK nga klinikat private”, tha Spahiu.
E njëri nga anesteziologët të cilët pritet të kthehet në QKUK, nga një institucion privat i tha “Indeksonline” se ai do të jetë pjesë e këtij konkursi të hapur dhe se pritet që së shpejti të kthehet në QKUK, për ta ushtruar profesionin e tij.
“Po unë do të kthehem në QKUK. Rritja e pagave është njëra nga arsyet që unë po kthehem, por nuk është e vetmja”, tha ai./IndeksOnline/