Në Kosovë ka filluar zbatimi i Kalendarit të ri të vaksinimit të rregullt.
Kështu kanë bërë të ditur përmes një njoftimi, Instituti Kombëtar i Shëndetësisë Publike të Kosovës (IKShPK).
Sipas komunikatës bëhet e ditur se pjesë e këtij kalendari janë edhe tri vaksina të tjera që po përdoren në Kosovë: vaksina kundër Pneumokokut, vaksina kundër Rotavirusit dhe vaksina kundër Virusit të Papillomës Humane (HPV).
“Vaksina kundër pneumokokut është shumë efektive, mbron nga format e rënda të sëmundjes së pneumokokut, si meningjiti, pneumonia dhe bakteremia. Forma më e zakonshme e rëndë e sëmundjes së pneumokokut është pneumonia. Pneumonia është një problem shumë i madh shëndetësor tek fëmijët e vegjël. Më rrallë, pneumokoku shkakton meningjitin, i cili mund të jetë fatal ose të shkaktojë me aftësi të kufizuara të përhershme në rreth 15-20%, humbje të dëgjimit, paaftësi në të mësuar dhe paaftësi të tjera fizike. Gjithashtu, pneumokoku është shkaktar i infeksioneve të shpeshta, por më pak të rënda si otitis media, sinusiti dhe bronkiti”, thuhet në njoftim.
Komunikata e plotë nga IKSHPK:
Në Kosovë ka filluar zbatimi i Kalendarit të ri të vaksinimit të rregullt. Pjesë e këtij kalendari janë edhe tri 💉vaksina të tjera që po përdoren në Kosovë:
- Vaksina kundër Pneumokokut
- Vaksina kundër Rotavirusit dhe
- Vaksina kundër Virusit të Papillomës Humane (HPV)
ℹ️Vaksina kundër pneumokokut është shumë efektive, mbron nga format e rënda të sëmundjes së pneumokokut, si meningjiti, pneumonia dhe bakteremia.
Forma më e zakonshme e rëndë e sëmundjes së pneumokokut është pneumonia. Pneumonia është një problem shumë i madh shëndetësor tek fëmijët e vegjël. Më rrallë, pneumokoku shkakton meningjitin, i cili mund të jetë fatal ose të shkaktojë me aftësi të kufizuara të përhershme në rreth 15-20%, humbje të dëgjimit, paaftësi në të mësuar dhe paaftësi të tjera fizike
Gjithashtu, pneumokoku është shkaktar i infeksioneve të shpeshta, por më pak të rënda si otitis media, sinusiti dhe bronkiti.
Vaksinat e pneumokokut për përdorim tek foshnjat, jepen me injeksion intramuskular në një dozë prej 0,5 ml.
Seria primare përbëhet nga dy doza në intervale prej tetë javësh duke filluar në moshën 2 muaj dhe një dozë të tretë në 12 muaj.
ℹ️Rotavirusi shkakton infeksion që karakterizohet me diarre të rëndë, të vjella, dhimbje barku dhe temperaturë të lartë. Rotavirusi është shkaku më i shpeshtë i sëmundjes së rëndë diarreike tek foshnjat dhe fëmijët e vegjël në mbarë botën.
Rotavirusi është shumë ngjitës dhe përhapet lehtë nga fëmijët që tashmë janë të infektuar tek fëmijët tjerë.
Studimet tregojnë se vaksina është shumë efektive (85%-98%) kundër sëmundjes së rëndë të shkaktuar nga rotavirusi.
Vaksinimi në kohë është shumë i rëndësishëm për vaksinën kundër rotavirusit.
Vaksina e Rotavirusit jepet me 2 doza përmes gojës:
- Doza e parë në moshën 2 muaj
- Doza e dytë/ e fundit në moshën 4 muaj
ℹ️Kanceri i qafës së mitrës është shkaku kryesor i vdekjes në botën në zhvillim dhe kanceri i dytë më i zakonshëm tek gratë në tërë botën. Virusi i Papillomës Humane (HPV) është shkaktari kryesor i kancerit të qafës së mitrës.
Zbulimi i vaksinave kundër HPV ka ofruar një mjet të fuqishëm për parandalimin e kancerit të qafës së mitrës dhe jo vetëm.
Vaksina kundër HPV është vaksinë e sigurt, jepet IM 0,5 ml ne krah dhe tolerohet mirë, mund të ketë reaksion në vendin e injektimit si skuqje, dhimbje dhe ënjtje.
Në Kosovë, vaksina kundër HPV jepet te vajzat e moshës 12 vjeçe, nxënëset e klasës së VI-të.