Në një operacion të ndërmarrë nga Njësitë Antikontrabandë të Doganës së Kosovës në pikën kufitare Dheu i Bardhë me Serbinë më 23 nëntor 2023, një autobus është zgjedhur për një kontroll detajuar. Rezultati i këtij kontrolli ka qenë i suksesshëm, duke zbuluar një sasi të konsiderueshme të pajisjeve kirurgjike që po transportoheshin në mënyrë të paligjshme.
Sipas njoftimit nga Dogana e Kosovës përpos qëllimit të kontrabandimit, është vërejtur se pajisjet kirurgjike po transportoheshin në kushte jo të përshtatshme dhe jo sterile, duke shkelur kështu rregullat dhe standardet e kërkuara për transportin e mallrave të këtij lloji, përcjell Gazeta Shneta.
Dogana e Kosovës ka sekuestruar menjëherë mallrat e gjetura dhe ka nisur procedurat kundërvajtëse ndaj personave të përfshirë në këtë aktivitet të paligjshëm.
Dogana e Kosovës thekson se ky veprim është pjesë e angazhimit të vazhdueshëm të institucionit për luftën kundër dukurive negative dhe për mbrojtjen e shëndetit të qytetarëve. Institucioni mbetet i përkushtuar në përpjekjet e vazhdueshme për të forcuar sigurinë doganore dhe për të garantuar zbatimin e standardeve të larta në të gjitha procedurat e saj.
