Një studim i fundit ka nxjerrë në dritë shqetësimet lidhur me përdorimin e aspirinës për parandalimin e goditjes në tru tek të moshuarit. Aspirina, e përdorur shpesh nga mjekët për trajtimin e goditjeve në tru, tani po shqyrtohet më kritikisht për rrezikun e mundshëm të gjakderdhjes së trurit.
Goditjet në tru ndahen në dy lloje kryesore: iskemike dhe hemorragjike. Ndërsa njerëzit plaken, rreziku i mpiksjes së gjakut dhe goditjes iskemike rritet. Për të parandaluar këtë rrezik, mjekët kanë përdorur aspirinën, e njohur për aftësinë e saj për hollim të gjakut, shkruan The Sun, transmeton Gazeta Shneta.
Megjithatë, studimi australian, i publikuar në JAMA dhe i bazuar në analizën e 19,114 pjesëmarrësve mbi moshën 70 vjeçare, sugjeron se dozat e rregullta të aspirinës për njerëzit e moshuar që nuk kanë pësuar goditje në tru kanë më shumë rreziqe sesa përfitime. G
jatë periudhës së studimit, një grup mori doza të vogla ditore të aspirinës, ndërsa grupi tjetër mori një placebo. Rezultatet treguan se 1.5% e atyre që merrnin aspirinë përjetuan një goditje iskemike, krahasuar me 1.7% të grupit placebo. Në të njëjtën kohë, 1.1% e pjesëmarrësve që merrnin aspirinë përjetuan gjakderdhje në tru, krahasuar me 0.8% të grupit placebo.
Një studim tjetër vuri në dukje se marrja e aspirinës rregullisht mund të rrisë rrezikun e zhvillimit të anemisë, veçanërisht te njerëzit mbi 65 vjeç. Efektet anësore nga marrja e aspirinës përfshijnë dispepsi të lehtë dhe një tendencë për gjakderdhje më të lehtë. Këshillohet që të moshuarit të jenë të kujdesshëm, veçanërisht kur bëjnë aktivitete që mund të shkaktojnë lëndime ose prerje./Gazeta Shneta/