Shërbimi Spitalor Klinik Universitar i Kosovës. përmes një njoftimi në Facebook ka bërë të ditur se në Klinikën e Onkologjisë të Qendrës Klinike Universitare të Kosovës (QKUK) prej fillimit të vitit 2023, kanë zhvilluar mbi 50 mijë vizita onkologjike.
Përveç numrit të lartë të vizitave, sipas regjistrit të klinikës, janë raportuar 2 mijë raste të reja me kancer. Në këtë kohë, Reparti i kimioterapisë ka përgatitur dhe administrur mbi 100 mijë terapi sistematike me teknika të ndryshme, duke perfshirë trajtimet tabletare, subkutane dhe intravezikale. Gjithashtu, Reparti i Radioterapisë ka ofruar mbi 31 mijë shërbime të specializuara për trajtimin me radioterapi, duke përfshirë teknikat më të fundit dhe metodat e ndërhyrjeve të realizuara nga mjekët, fizikantët mjekësorë dhe teknikët e radioterapisë.
Në këtë kontekst, Klinika Onkologjisë ka realizuar me sukses 2 mijë shërbime të Brakiterapisë në bashkëpunim të ngushtë me anesteziologët e Klinikës së Anesteziologjisë. Sipas njoftimit të publikuar në faqen e tyre zyrtare, Shërbimi i Fizikës Mjekësore ka siguruar rreth 11 mijë shërbime gjatë vitit 2023, duke ofruar shërbime të vlefshme të fizioterapisë dhe shërbime psikologjike për më shumë se 600 pacientë në nevojë.
Përveç trajtimit të pacientëve, kjo klinikë ka pasur një investim të rëndësishëm nga Ministria e Shëndetësisë, në bashkëpunim me QKUK. Investimi ka synuar rinovimin e hapësirave të Klinikës Onkologjisë dhe furnizimin e saj me aparaturën e dytë të rrezatimit, duke përfshirë akseleratorin linear. Kjo pajisje moderne siguron metodat më të përparuara të radioterapisë, duke përfshirë edhe radioterapinë stereotaktike.
Në këtë kohë, regjistri i rasteve të paraqitura për herë të parë në klinikën e onkologjisë ka zbuluar një rritje progresive në numrin e rasteve të reja për vitin 2023. Kjo dëshmon për përpjekjet e vazhdueshme dhe angazhimin e klinikës për trajtimin dhe menaxhimin e sëmundjeve malinje. QKUK vazhdon të jetë një pikë referimi dhe burim i shëndetit të qytetarëve në luftën kundër kancerit./GazetaShneta/