Me tavanin e rënë dhe telat e rrymës të varur, studentët e stomatologjisë kanë mbajtur ligjëratën në këto kushte në bodrumin e QKSUK-së. Kjo e fundit sot i ka hequr pjesët e dëmtuara ndëra studentëve iu është thënë se pritet renovimi i sallës.
Studentët e stomatologjisë në QKSUK gjatë ditës së djeshme kanë mbajtur një ligjëratë në kushte aspak të duhura e madje me rrezik potencial, shkruan Gazeta Shneta.
Kjo për shkak se në sallën e cila gjendet në bodrum, ka rënë një pjesë e tavanit dhe janë varur edhe tela të rrymës për shkak të dëmtimit të llampave.
Kjo gjendje është adresuar edhe në Gazetën Shneta ku njëri nga studentët i cili ka dashur të mbetet anonim, ka dërguar fotografitë dhe ka sqaruar rastin.
“Salla në podrum ndodhet në gjendje të mjerueshme pasi që tavani pjesërisht ka rënë dhe pjesa e mbetur siç shihet në foto është gjithashtu jo stabile. Telat e rrymës dhe dritat janë të varura nga tavani dhe nëpër tokë, duke paraqitur rrezik sepse plot studentë të Fakulteti Mjekësisë (programi Stomatologji) mbajnë ligjëratat ne atë sallë”, ka thënë studenti.
Ndërkaq Këshilli Studentor ka njoftuar më pas se QKSUK i ka larguar pjesët e dëmtuara nga salla dhe atyre iu është thënë se e njëjta do të rinovohet. /Gazeta Shneta/
