SHSKUK dhe OMK kanë nënshkruar sot një memorandum me anë të të cilit janë marr vesh që të financojnë bashkërisht trajnime specifike për mjekët e nivelit dytësor dhe tretësor.
Drejtori i Shërbimit Spitalor Klinik dhe Universitar Elvir Azizi dhe kryetari i Odës së Mjekëve të Kosovës Pleurat Sejdiu, kanë nënshkruar sot një memorandum për financimin e përbashkët për trajnime specifike për mjekët e nivelit dytësor dhe tretësor, shkruan Gazeta Shneta.
Në këtë memorandum SHSKUK do të marr përsipër 60 përqind të shpenzimeve, kurse OMK do të mbulojë 40 për qind.
Azizi ka thënë se kjo është zanafilla e një bashkëpunimi dhe hapje e institucionit ndaj Odës. “Besoj që do të bashkëpunojmë në të ardhmen. Njëra nga kërkesat tona është që t’i përmbahemi kodit të etikës së Odës së Mjekëve dhe prandaj do të gjejmë edhe forma tjera për të ngritur cilësinë e shërbimeve”, ka deklaruar Aizi.
Sejdiu në anën tjetër ka falënderuar Azizin duke thënë se kanë pritur që katër vite një drejtor për të vënë firmën në këtë memorandum.
“Që katër vjet po presim për këtë marrëveshje dhe sot në ditën përkujtimore të punëtorëve shëndetësore po e nënshkruajmë këtë memorandum”, ka thënë Sejdiu.
Ai ka folur edhe për respektimin e kodit të etikës për mjekët, duke thënë se do t’i mbrojnë anëtarët e Odës brenda kornizave të ligjit. “Sa i përket etikës këtë vit kemi planifikuar që t’i njoftojmë anëtarët se cilat janë limitet që ne mund t’i mbrojmë. Ne do të mbrojmë ligjin dhe brenda ligjit nuk do të lejojmë askënd që të shkel mjekët”, ka deklaruar Sejdiu.
Përfituesit nga ky memorandum do të jenë mjekët e punësuar në institucionet e SHSKUK-së. Sipas Nenit 1.1 të memorandumit, përfituesit do të kushtëzohen me punë deri në 3 vite me orar të plotë në SHSKUK ose kthim të mjeteve që kanë përfituar për trajnim.
Sipas Nenit 1.6 klinikat e QKUK-së dhe spitalet rajonale do të përpilojnë listat vjetore me lëmitë prioritare dhe planet vjetore të trajnimeve. Përzgjedhjen e mjekëve do ta bëj SHSKUK. /Gazeta Shneta/