Një 62-vjeçar nga Gjermania, kundër këshillës mjekësore, është vaksinuar 217 herë kundër Covid-it, raportojnë mjekët.
Rasti i çuditshëm është dokumentuar në revistën “The Lancet Infectious Diseases”, raporton BBC përcjell Gazeta Shneta.
Vaksinat janë blerë dhe dhënë privatisht brenda 29 muajve. Pacienti duket se nuk ka pësuar asnjë efekt të keq, kanë konfirmuar studiuesit nga Universiteti i Erlangen-Nurembergut.
“Ne mësuam për rastin e tij nëpërmjet artikujve të gazetave,” tha Dr. Kilian Schober, nga departamenti i mikrobiologjisë së universitetit. Më pas e kontaktuam dhe e ftuam të bënte teste të ndryshme në Erlangen. Ai ishte shumë i interesuar ta bënte këtë”.
Dr. Schober tha se: “Ne ishim në gjendje të merrnim vetë mostrat e gjakut kur 62-vjeçari mori një vaksinim të mëtejshëm gjatë studimit me insistimin e tij. Ne ishim në gjendje t’i përdornim këto mostra për të përcaktuar saktësisht se si sistemi imunitar reagon ndaj vaksinimit.”
Evidencat për 130 dozat u mblodhën nga prokurori publik i qytetit të Magdeburgut, i cili hapi një hetim me pretendimin për mashtrim, por nuk u ngrit asnjë akuzë penale.
Vaksinat kundër Covid-19 nuk mund të shkaktojnë infeksion, por mund ta mësojnë trupin se si të luftojë sëmundjen.
Vaksinat e acidit ribonukleik mesengjere (ARNm) funksionojnë duke u treguar qelizave të trupit pak kod gjenetik nga virusi. Më pas, sistemi imunitar duhet të njohë dhe të dijë se si të luftojë Covid-in nëse e hasin realisht.
Dr. Schober shqetësohej se hiper-stimulimi i sistemit imunitar me doza të përsëritura mund të kishte lodhur disa nga këto qeliza.
Por studiuesit nuk gjetën asnjë provë për këtë tek 62-vjeçari.
Dhe nuk kishte asnjë shenjë se ai ishte infektuar ndonjëherë me Covid-19.
Studiuesit si përfundim thanë se: “E rëndësishmja, ne nuk e miratojmë hiper-vaksinimin si një strategji për të rritur imunitetin adaptiv.”
Dhe rezultatet e testeve të tyre mbi 62-vjeçarin ishin të pamjaftueshme për të nxjerrë përfundime të gjera, e lëre më rekomandime për publikun. /Gazeta Shneta/