Një studim i ri sugjeron se të moshuarit mund të lëvizin më ngadalë pjesërisht sepse u kushton më shumë energji sesa të rinjve.
Studiuesit besojnë se këto gjetje mund të çojnë në mjete të reja diagnostikuese për sëmundje të tilla si Parkinsoni dhe skleroza multiple, shkruan Medical News, transmeton Gazeta Shneta.
Është e njohur që trupat tanë bëhen më të ngadalshëm në lëvizjet e tyre me kalimin e moshës. Disa shpjegime të mundshme përfshijnë një metabolizëm më të ngadaltë, humbjen e masës muskulore dhe rënien e aktivitetit fizik me kalimin e kohës.
Tani, studiuesit nga Universiteti i Kolorados në Boulder thonë se të moshuarit mund të lëvizin më ngadalë pjesërisht sepse u kushton më shumë energji për ta bërë këtë sesa të rinjve.
Shkencëtarët besojnë se ky hulumtim i ri — i botuar së fundmi në revistën The Journal of Neuroscience — mund të ndihmojë në krijimin e mjeteve të reja diagnostikuese për sëmundje si Parkinsoni dhe skleroza multiple.
Për këtë studim, studiuesit rekrutuan 84 pjesëmarrës të shëndetshëm, përfshirë të rritur të rinj të moshës 18 deri 35 vjeç dhe të moshuar të moshës 66 deri 87 vjeç.
Gjatë studimit, pjesëmarrësit u kërkua të arrinin një objektiv në një ekran duke mbajtur një krah robotik në dorën e djathtë. Krahu robotik operonte ngjashëm me një maus kompjuteri.
Duke analizuar modelet e mënyrës se si pjesëmarrësit e studimit kryenin lëvizjet e tyre, shkencëtarët zbuluan se të moshuarit modifikonin lëvizjet e tyre në momente të caktuara për të ndihmuar në ruajtjen e energjisë së tyre më të kufizuar, krahasuar me të rinjtë.