Profesionistët shëndetësorë kanë vërejtur se viteve të fundit, qytetarët nuk hezitojnë t’i adresojnë problemet e tyre që lidhen me shëndetin mendor. Vetëm gjatë vitit të kaluar, në Klinikën e Psikiatrisë u hospitalizuan mbi 700 pacientë dhe u trajtuan mbi 26 mijë raste.
Miliona njerëz në të gjithë botën kërkojnë trajtim për problemet e shëndetit mendor. Edhe në Kosovë numri i pacientëve të tillë është i madh. Drejtori i Klinikës së Psikiatrisë, Faton Kutllovci, bëri të ditur për Radio Kosovën numrin e pacientëve të cilët kanë kërkuar trajtim dhe hospitalizim në Klinikën Psikiatrike gjatë vitit të kaluar.
“Gjatë vitit 2023 në Klinikën e Psikiatrisë janë trajtuar 723 pacientë të hospitalizuar me 11 mijë e 497 ditë mjekimi e po ashtu kanë marrë shërbime ambulatore 26 mijë e 800 persona”, tha Kutllovci
Ndërsa, zëvendësdrejtoresha e Qendrës për Hulumtime Psiko-Sociale, Veronë Përçuku, thekson problemet më të shpeshta të shëndetit mendor me të cilat përballen pacientët.
“Disa të dhëna të akumuluara që janë realizuar me popullatën në Kosovë, del se problemet e shëndetit emocional me të cilat përballen më së shumti kosovarët janë çrregullimet e depresionit, ankthit, stresit post-traumatik, dhe abuzimi me substancat narkotike”, tha Përçuku.
Sipas saj, arsyet më të shpeshta që çojnë një pacient drejt sëmundjeve mendore janë: papunësia, varfëria, dhe mungesa e qasjes në kujdes shëndetësor.
Ndryshe, neuropsikiatërit, neurologët dhe psikologët thonë se viteve të fundit, qytetarët kanë filluar të flasin më hapur me profesionistët shëndetësorë lidhur me shqetësimet e tyre. Psikologu Fitim Uka, flet për rëndësinë e trajtimit me kohë të këtyre problemeve.
“Duhet të flasin për shëndetin e tyre mendor, të flasin për vështirësitë që ballafaqohen, sepse komunikimi e lehtëson cilëndo gjendjeje emocionale negative. Njerëzit duhet ta trajtojnë shëndetin mendor po aq të rëndësishëm sa shëndetin fizik, t’i kushtojnë rëndësi dhe të bëjnë konsulta të vazhdueshme me psikologë”, tha Uka.
Gjatë javës së shkuar në Kosovë është shënuar java e shëndetit mendor, me aktivitete të ndryshme. Me këtë rast, ministria e Shëndetësisë ndau 100 mijë euro për organizatat joqeveritare që merren me shëndetin mendor./RTK/