Një program i Inteligjencës Artificiale (AI) është dëshmuar të jetë më mirë në shoshitjen e shenjave treguese që tregojnë se kush me demencë të hershme që do të përparojë në sëmundjen e Alzheimerit sesa vlerësimi i mjekëve, zbulon studimi i ri.
AI parashikoi në katër raste nga pesë kur demenca e hershme ose do të mbetej e qëndrueshme ose do të përkeqësohej në Alzheimer, sipas një raporti në revistën “eClinical Medicine”, shkruan burimi Health Day përcjell Gazeta Shneta.
Në përgjithësi, AI ishte rreth tre herë më i saktë në parashikimin e progresionit në Alzheimer sesa mjekët e armatosur me skanime të trurit, testime njohëse dhe analiza të lëngjeve kurrizore për proteinat treguese si tau dhe amiloidet, zbulojnë rezultatet.
“Ne kemi krijuar një mjet i cili, pavarësisht se përdor vetëm të dhëna nga testet njohëse dhe skanimet MRI, është shumë më i ndjeshëm sesa qasjet aktuale në parashikimin nëse dikush do të përparojë nga simptoma të buta në Alzheimer – dhe nëse po, ky përparim a do të jetë i shpejtë ose i ngadalshëm,” tha studiuesja Zoe Kourtzi, një profesoreshë e psikologjisë eksperimentale dhe neuroshkencës kognitive llogaritëse në Universitetin e Kembrixhit në Mbretërinë e Bashkuar.
Për studimin, studiuesit ndërtuan një model të AI duke përdorur skanime të trurit dhe teste njohëse nga 400 njerëz që morën pjesë në një projekt kërkimor në SHBA.
Ekipi hulumtues më pas testoi modelin duke i dhënë atyre rezultatet e testeve njohëse të botës reale dhe skanimet e trurit nga 600 pacientë të tjerë amerikanë nga i njëjti projekt, si dhe 900 njerëz që kërkuan trajtim në klinikat e kujtesës në Mbretërinë e Bashkuar dhe Singapor.
AI ishte në gjendje të tregonte se kush do të zhvillonte Alzheimer brenda tre viteve në 82% të rasteve dhe kush do të kishte demencë të butë por të qëndrueshme në 81% të rasteve, tregojnë rezultatet.
Mes tjerash, AI, gjithashtu i lejoi studiuesit të vendosnin pacientët në grupe bazuar në rrezikun e tyre. Rreth 50% e pjesëmarrësve kishin demencë që do të mbetej e qëndrueshme, ndërsa 35% do të përparonin në Alzheimer më ngadalë dhe 15% prej tyre më shpejt.
“Vizioni ynë është të rrisim mjetin tonë të AI për të ndihmuar mjekët të caktojnë personin e duhur në kohën e duhur në rrugën e duhur diagnostikuese dhe të trajtimit,” tha profesoreshë Kourtzi. “Mjeti ynë mund të ndihmojë në përputhjen e pacientëve të duhur me provat klinike, duke përshpejtuar zbulimin e ilaçeve të reja për trajtimet që modifikojnë sëmundjen”. /Gazeta Shneta/