Ka disa vite që në mungesë të Spitalit të Prishtinës, qytetarët e saj shërbimet primare i marrin nëpër qendra të mjekësive, ndërsa ato terciare në Qendrën Klinike Universitare të Kosovës. Por ky projekt i cili është prezantuar disa herë, duket se së shpejti pritet të nisë. Kështu të paktën thonë zyrtarë nga Komuna e Prishtinës, të cilët deklaruan se janë në pritje të miratimit të planit të projektit që në vjeshtë të nisin procedurat e tenderimit për ndërtimin e Spitalit të kryeqytetit.
Toka është caktuar dhe projekti për ndërtimin e Spitalit të Prishtinës tashmë është finalizuar.
Mirëpo, për nisjen e procedurave të tenderimit, Komuna e Prishtinës është në pritje të dritës së gjelbër të miratimit të planit për këtë projekt.
“Procesi i ndërtimit të spitalit ështe në fazen ku është dergu në MPB, dhe gjitha punët për planin detaj për këtë project janë përfundu. Vendi se ku pritet të bëhet spitali është të Prishtina e Re dhe po presim dritën e gjelbër nga ministria. Nëse gjtihçka shkon në rregull, besoj që në vjeshtë ta kemi të tenderuar, por mund të ndodh edhe me herët”, tha Donat Lushaku, zëdhënës në Komunën e Prishtinës.
Ndërtimi i spitalit për qytetarët e Prishtinës është nevojë urgjente.
“Është shumë më rëndësi që spitali të ndërtohet për shkak të fluksit të madh. Do ta lehtësonte punen shumë të spitalit qendor, është i nevojshem, është urgjente”, u shpreh një qytetar.
“Është jashtëzakonisht i nevojshëm, kryesore është shëndetësia. Secili ka nevojë për me shku në spital, aty duhet me investu dhe ndërtu”, tha një qytetar tjetër.
Kryetari i Komunës, Përparim Rama, pati thënë se ky projekt i shumëpritur do ta bëjë më të lehtë qasjen në shërbime shëndetësore dytësore për qytetarët.
Spitali i kryeqytetit do të kushtojë rreth 50 milionë euro dhe parashihet t`i ketë repartin e Kardiologjisë, të Gjinekologjisë, Pediatrisë, dhe shërbime të tjera./RTK/