Studiuesit kanë bërë një zbulim të rëndësishëm në fushën e neuroshkencës, duke identifikuar qarkun e trurit që aktivizohet gjatë efektit placebo, i cili mund të ndihmojë në lehtësimin e dhimbjes.
Ky zbulim, i publikuar në revistën Nature ofron mundësi të reja për trajtimin e dhimbjes në mënyrë më efikase dhe pa efekte anësore, duke shfrytëzuar mekanizmat e trupit përmes barnave, neurostimulimit ose terapive konjitive të sjelljes, shkruan NIH, transmeton Gazeta Shneta.
Studimi u realizua nga një grup studiuesish të koordinuar nga Grégory Scherrer, të cilët kryen eksperimente mbi minjtë për të kuptuar më mirë mekanizmat e efektit placebo. Minjtë u mësuan të lidhin dy dhoma me temperatura të ndryshme dyshemesë, duke krijuar një pritshmëri për lehtësimin e dhimbjes. Gjatë këtyre eksperimenteve, studiuesit zbuluan se pritshmëria për lehtësim aktivizon sinjale në një qark të trurit që fillon nga korteksi anterior dhe përfundon në trungun encefalik dhe trurin e vogël.
“Fakti që neuronet në korteksin tonë cerebral komunikojnë me ponsin dhe trurin e vogël për rregullimin e pragjeve të dhimbjes ishte plotësisht i papritur dhe shumë emocionues,” tha Scherrer. “Këto rezultate hapin rrugën për mënyra të reja të trajtimit të dhimbjes kronike, duke ofruar trajtime pa efekte anësore dhe që nuk shkaktojnë varësi.”
Efekti placebo, shpesh i anashkaluar, është një komponent thelbësor në procesin e shërimit, duke kontribuar ndjeshëm në efektin e medikamentit. Ky studim tregon se placebo nuk vepron drejtpërdrejt në qendrat e dhimbjes, por në ato të funksioneve cerebrale superiore, duke theksuar rëndësinë e gjendjes psikologjike në perceptimin e simptomave dhe efektivitetin e terapive.
Zbulimi gjithashtu tregon se korteksi anterior, zona nga e cila nis qarku, është aktivizuar në terapi të tjera si hipnoza dhe meditimi, duke sugjeruar se kjo zonë mund të përdoret për të trajtuar dhimbjen edhe pa ndërhyrje farmaceutike. Ky zbulim ka potencialin për të revolucionarizuar trajtimet për dhimbjen kronike dhe për të përmirësuar jetën e shumë pacientëve./Gazeta Shneta/