Në gjetjet që ofrojnë prova bindëse të fuqisë së vaksinave të fëmijërisë, një raport i ri i qeverisë amerikane tregon se vaksinat rutinë kanë parandaluar qindra miliona sëmundje, dhjetëra miliona shtrime në spital dhe më shumë se 1 milion vdekje midis amerikanëve të lindur në 30 vitet e fundit.
Të dhënat e reja, të publikuara të enjten nga Qendrat Amerikane për Kontrollin dhe Parandalimin e Sëmundjeve (CDC), analizuan përfitimet e Programit të Vaksinave për Fëmijë, i cili u lançua në vitin 1994 për t’i bërë imunizimet e fëmijërisë më të përballueshme dhe të arritshme.
Rezultatet e hulumtimit janë një “dëshmi e suksesit” të vaksinimeve për parandalimin e sëmundjeve, tha për CNN, Dr. Sara Siddiqui, një pediatre në Spitalin e Fëmijëve Hassenfeld në Nju Jork.
“Këto janë vaksina që rekomandohen aktualisht në serinë e vaksinave të fëmijërisë dhe gjithashtu ofrohen me kosto të reduktuar si pjesë e Programit të Vaksinimit për Fëmijët. Jam shumë e kënaqur dhe mirënjohëse që shoh këtë studim duke u kryer për të raportuar përfitimet shëndetësore të vaksinimeve si një mënyrë për të parandaluar sëmundjet,” shtoi Dr. Siddiqui.
“Detyra ime si pediatër është t’i mbaj fëmijët të shëndetshëm dhe jashtë spitalit. Vaksinimet janë një mënyrë për t’i mbajtur fëmijët të shëndetshëm dhe për të parandaluar ashpërsinë e sëmundjes,” shtoi ajo. “I inkurajoj të gjithë prindërit që vazhdimisht të kenë një bisedë dhe diskutim me pediatrin e tyre për çdo vaksinë që duhet të i bëhet fëmijës së tyre, si dhe për sëmundjen specifike që do të ndihmonte në parandalimin.”
Çfarë zbuluan ata?
Mes rreth 117 milionë fëmijëve të lindur nga viti 1994 deri në vitin 2023, vaksinimet rutinë do të kenë parandaluar rreth 508 milionë raste sëmundjesh, 32 milionë shtrime në spital dhe pak më shumë se 1 milionë vdekje.
Numri i sëmundjeve të parandaluara në studim varionte nga rreth 5000 raste për tetanoz në rreth 100 milionë raste për fruthin dhe varicelën.
Numri më i madh kumulativ i vlerësuar i shtrimeve në spital dhe vdekjeve të parandaluara ishte rreth 13.2 milionë shtrime në spital për fruthin dhe rreth 752,800 vdekje nga difteria, shkruajnë studiuesit.
Analiza e tyre zbuloi gjithashtu se vaksinimet rutinë të fëmijërisë sollën një kursim neto prej 540 miliardë dollarësh në kosto direkte, siç janë kostot e trajtimit të një infeksioni dhe 2.7 trilion dollarë në kosto shoqërore, si p.sh. prindërve që u mungonin puna për t’u kujdesur për një fëmijë të sëmurë. /Gazeta Shneta/