Përdorimi i prezervativëve tek adoleshentët seksualisht aktivë ka pësuar një rënie të ndjeshme në Evropë gjatë dekadës së fundit, sipas një raporti të ri të publikuar nga Organizata Botërore e Shëndetësisë (OBSH). Kjo rënie ka ndikuar në rritjen e seksit të pambrojtur dhe rrezikun e sëmundjeve seksualisht të transmetueshme (STD) dhe shtatzënive të paplanifikuara.
Raporti, i cili përfshin të dhëna nga më shumë se 242,000 adoleshentë 15-vjeçarë në 42 vende të Evropës dhe Azisë Qendrore, tregon se përqindja e djemve që përdorën prezervativin gjatë marrëdhënieve të fundit seksuale ra në 61% në vitin 2022, nga 70% në vitin 2014. Po ashtu, përqindja e vajzave që raportuan përdorimin e prezervativit ra në 57% nga 63% gjatë të njëjtës periudhë, shkruan WHO, transmeton Gazeta Shneta.
Një e treta e adoleshentëve (30%) raportuan se nuk përdorën as prezervativ dhe as pilulë kontraceptive gjatë marrëdhënieve seksuale, një normë që ka mbetur e qëndrueshme që nga viti 2018. Përdorimi i pilulave të kontrollit të lindjes mbeti në 26% për adoleshentët e pyetur.
Raporti gjithashtu thekson se adoleshentët nga familjet më të varfra kanë më shumë gjasa të mos përdorin as prezervativ apo pilula kontraceptive (33%) krahasuar me ata nga familjet më të pasura (25%).
Drejtori i OBSH-së për Evropë, Hans Kluge, theksoi se edukimi seksual gjithëpërfshirës dhe i përshtatshëm për moshën është i nevojshëm për të përmirësuar rezultatet shëndetësore dhe për të zvogëluar rreziqet. Ai gjithashtu kritikoi rënien e ofrimit të këtyre edukatave dhe rritjen e sulmeve ndaj tyre.
Raporti përfundon se neglizhenca ndaj edukatës seksuale e bën më të vështirë menaxhimin e problemeve shëndetësore dhe rrit kostot e shërbimeve shëndetësore, duke ndikuar negativisht në jetën shkollore dhe të punës së të rinjve. OBSH kërkon ndërhyrje nga qeveritë dhe autoritetet shëndetësore për të adresuar këto probleme dhe për të parandaluar përkeqësimin e situatës./Gazeta Shneta/