Hulumtime të reja të kryera nga Universiteti i Kalifornisë San Diego kanë zbuluar se përdorimi i tharëseve UV të thonjve, të cilat janë të zakonshme për manikyrët me xhel, mund të çojë në vdekje të konsiderueshme të qelizave, dëmtime të ADN-së dhe mutacione që mund të rrisin rrezikun për zhvillimin e kancerit të lëkurës.
Këto pajisje, të cilat shpesh përdoren pa konsiderata për rreziqet e mundshme, kanë rezultuar të jenë shumë më të dëmshme se sa pritej, shkruan Healthfeed, transmeton Gazeta Shneta.
Studimi tregon se një seancë 20-minutëshe ekspozimi në këto pajisje shkaktoi vdekjen e 20%-30% të qelizave të lëkurës, ndërsa tre seanca të njëpasnjëshme rritën këtë përqindje në 65%-70%. Përveç vdekjes së qelizave, studiuesit zbuluan edhe dëmtime në mitokondrit dhe ADN-në e qelizave të mbijetuara
Përveç rrezikut të ekspozimit ndaj UV-së, tymi toksik që lirohet në sallonet e thonjve përbën një tjetër rrezik shëndetësor. Për të minimizuar këto rreziqe, këshillohet përdorimi i kremit kundër diellit, dorezave pa gishta dhe maskave, si dhe sigurimi që salloni të jetë mirë ajrosur.
Autorja e studimit, Maria Zhivagui, PhD, e cila më parë bënte manikyr me xhel rrallë, vendosi të ndalojë tërësisht pas këtij zbulimi. Ajo shprehet se ndikimi i vetëm një seance ishte shumë alarmues.
Ky studim është një prej të parëve që fokusohet në rreziqet specifike të tharëseve të thonjve me xhel, duke u shtuar në listën e gjatë të paralajmërimeve për ekspozimin ndaj rrezatimit UV.