Pjelloria mashkullore është në qendër të tendencave të reja të tregut, pasi studime të ndryshme kanë vërtetuar një ulje të cilësisë riprodhuese të spermës.
Një studim i publikuar në maj 2023 në revistën shkencore “Toxicological Sciences” gjeti mikroplastikë në çdo testikul njerëzor të ekzaminuar, duke shkaktuar shqetësim dhe studime të tjera zbuluan gjithashtu, siç raporton Business of Fashion, se numri i spermatozoidëve është përgjysmuar në 50 vitet e fundit, megjithëse studime të mëtejshme i kundërshtojnë këto gjetje.
Këto studime kanë krijuar një trend të ri tregu për produktet për meshkuj, i cili nuk fokusohet më vetëm tek rritja e muskujve, por edhe tek fertiliteti dhe performanca seksuale. Influencuesit mjekësorë si neuroshkencëtari Andrew Huberman dhe mjeku Peter Attia kanë kontribuar gjithashtu në konfirmimin e kësaj tendence, të cilët e kanë lidhur gjithnjë e më shumë shëndetin fizik me suksesin profesional, social dhe sentimental.
Këto tendenca të reja kanë ndihmuar në gjenerimin e një vale produktesh që synojnë të rrisin fertilitetin dhe virilitetin mashkullor.
Në The Vitamine Shoppe, shitjet e produkteve mbështetëse të testosteronit janë dyshifrore gjatë vitit të kaluar, veçanërisht shitjet e suplementit të performancës seksuale Ultimate Libido.
Mars Men, një markë më e re, ofron një suplement ‘mbështetje natyrale të testosteronit’, ndërsa Human Desire prodhon një pije që rrit epshin. Në Mbretërinë e Bashkuar, Cialis, një alternativë ndaj Viagrës, është në dispozicion që nga viti i kaluar.
Për shumë dekada mendohej se infertiliteti ishte një problem i grave. Tani njerëzit po kuptojnë se ka një gjysmë tjetër të ekuacionit.
Edhe pse studiuesit ende nuk e kanë konstatuar përfundimisht nëse ka një krizë globale në fertilitetin mashkullor dhe as nëse suplementet e fertilitetit OTC (d.m.th. pa nevojën e një recete mjekësore) mund ta zgjidhin vërtet atë, është e sigurt që meshkujt, vitet e fundit, janë dukshëm më komod duke folur për infertilitetin mashkullor dhe duke kërkuar zgjidhje. /TiranaPost