Auditori i Brendshëm i SHSKUK-së ka gjetur plot parregullësi në pagesat e kujdestarive dhe ndërrimeve në tre spitale private dhe në tre klinika të QKUK-së. Bordi Drejtues ka kërkuar përgjegjësi, teksa drejtori ekzekutiv Elvir Azizi ka thënë se duhet të bëhet një plan veprimi përmes një grupi punues.
Bordi Drejtues i Shërbimit Spitalor Klinik dhe Universitar i Kosovës ka mbajtur sot mbledhjen e 58-të ku është prezantuar raporti i Auditorit të Brendshëm për pagesat e kujdestarive dhe ndërrimeve në tre spitale rajonale Vushtrri, Mitrovicë dhe Prizren, si dhe ne tre klinika të QKUK-së: Kirurgji Vaskulare, Ortopedi dhe ORL, shkruan Gazeta Shneta.
Në këtë raport janë evidentuar plot parregullësi në procesimin e pagesave për kujdestari për mjekët dhe për ndërrime për infermierët.
Këto parregullësi kanë të bëjnë me evidentimin e mbajtjes së kujdestarive dhe ndërrimeve. Në disa raste mjekët dhe infermierët janë paguar për kujdestari, përkatësisht për ndërrime, anipse nuk janë evidentuar fare në lista.
Auditori po ashtu ka gjetur se në reparte dhe klinika nuk përdoren librat standard për evidentimin e kujdestarive, por regjistrohen në fletore të thjeshta.
“Në muajin shtator një mjek sipas evidencave në librat e kujdestarive nuk ka asnjë kujdestari, ndërsa sipas raportit nga shefi i repartit i ka 6 kujdestari të cilat i janë paguar, një mjek tjetër sipas evidencave në libra të kujdestarive i ka 6 kujdestari, ndërsa sipas raportit nga shefi i repartit nuk ka asnjë kujdestari, ndërsa i janë paguar 3 kujdestari të mbajtura në repartin e Neonatologjisë”, thuhet në raportin e Auditorit për Spitalin e Mitrovicës.
Në këtë spital sipas raportit nuk ka raporte të rregullta për pagesa të orëve shtesë, në sektorin e financave dhe gjithashtu në repartin e kirurgjisë ndërrimet e natës për infermierë mbahen në fletore të thjeshta.
Situatë e njëjtë është edhe në Spitalin e Vushtrrisë dhe atë të Prizrenit, ku janë paguar kujdestari dhe ndërrime të cilat nuk janë të evidentuara fare.
Në Klinikën e Kirurgjisë Vaskulare në QKUK sipas raportit të auditorit, mjekët nuk nënshkruhen fare në librat e kujdestarive për kujdestaritë e mbajtura, ndërsa infermierët i shkruajnë vetëm inicialet.
“Në klinikën e Ortopedisë në dy raste sipas librave të kujdestarive i kanë mbajtur dy kujdestari ndërsa sipas listës nga reparti dhe financat janë kalkuluar dhe paguar tri kujdestari”, thuhet në raport.
Në ORL gjendja është pak më e mirë. Sipas këtij raporti janë testuar kujdestaritë për 8 mjekë dhe ndërrimet e natës për 4 infermierë dhe është gjetur se janë paguar sipas evidencave të protokolleve të kujdestarive dhe ndërrimeve të natës. Por këto libra nuk janë verifikuar nga shefi i repartit dhe infermieri kryesor.
Anëtarët e Bordit kërkojnë përgjegjësi, Azizi thotë se do të krijohet grup punues
Për shkeljet dhe parregullësitë e evidentuara në raportin e Auditorit të Brendshëm, anëtarët e Bordit Drejtues të SHSKUK-së kanë bërë thirrje për përgjegjësi dhe masa ndaj zyrtarëve që kanë bërë shkelje.
Kryesuesi i Bordit Dren Boshnjaku ka thënë se për këto shkelje, qofshin mos evidentim apo mos prani e stafit në kujdestari dhe ndërrime por që janë paguar, duhet të ndëshkohen kushdo që ka kryer shkelje të procedurave. Thirrje të njëjtë ka bërë edhe anëtarja Rrezarta Olloni, ndërsa Besa Balidemaj ka thënë se duhet të monitorohen stafi nëse janë të pranishëm në punë.
Drejtori ekzekutiv i SHSKUK-së Elvir Azizi ka thënë se mos evidentimi i stafit në libra të kujdestarive dhe ndërrimeve, nuk nënkupton se stafi nuk ka qenë i pranishëm në punë. Ai ka thënë se para disa ditësh ka inspektuar klinikat e QKUK-së gjatë ndërrimit të natës dhe nuk ka hasur në asnjë mungesë të stafit.
“Duhet të krijohet një grup punues e pastaj të merren masa në bazë të rekomandimeve. Nuk mund të marrim vendim për të goditur dikend në kokë menjëherë. Sepse me sa e kuptoj unë çështja është më shumë tek mos evidentimi, sesa tek mos prania e mjekut apo infermieres”, ka deklaruar Azizi. /Gazeta Shneta/