Nëse barku juaj shpesh ndihet i ngopur ose i shtrënguar pas ngrënies, duke rezultuar në parehati të vazhdueshme ose në gazra, mund të vuani nga fryrje kronike.
Në disa raste, fryrja mund të tregojë një gjendje themelore gastrointestinale, të tilla si sindroma e zorrës së irrituar (IBS), sëmundja inflamatore e zorrëve, rritja e tepërt e baktereve në zorrët e vogla ose intoleranca ndaj laktozës, shkruan burimi Best Life Wellness përcjell Gazeta Shneta.
Dieta ushqyese luan një rol të rëndësishëm andaj këtu do të analizojmë katër fruta të cilat mund të ju ndihmojnë në këtë drejtim:
– Banane të papjekura
Bananet janë të mbushura me kalium, vitaminë C, vitaminë B6, fibra, antioksidantë, fitonutrientë dhe më shumë. Përveçse kontribuojnë gjerësisht në dietën tuaj, ato gjithashtu mund të përmirësojnë simptomat e pakëndshme gastrointestinale dhe tretjen.
Bananet e papjekura konsiderohen veçanërisht të dobishme për të luftuar fryrjen dhe parehatinë e barkut. Kjo për shkak se ato përmbajnë niseshte rezistente, një karbohidrat që udhëton nëpër zorrët pa u prishur, duke promovuar shëndetin e zorrëve.
Niseshteja vepron si ushqim për rritjen e mikrobeve të dobishme në traktin tretës, shpjegon burimi Harvard Health Publishing.
“Mikrobet shpërbëjnë dhe fermentojnë niseshtën ndërsa kalon në zorrën e trashë, duke prodhuar acide yndyrore me zinxhir të shkurtër që mund të luajnë një rol në parandalimin e sëmundjeve kronike duke përfshirë çrregullimet e tretjes. Studimet klinike kanë treguar përdorimin e mundshëm të këtyre acideve në trajtimin e kolitit ulceroz, sëmundjes Crohn dhe diarresë së lidhur me antibiotikët”, shkruajnë ekspertët e tyre.
– Limoni
Sipas një studimi të vitit 2022 të botuar në Journal of Nutrition, ngrënia e limonëve ose pirja e lëngut të tyre mund të ndihmojë në zbrazjen më të shpejtë të stomakut, gjë që mund të ndihmojë në reduktimin e ndjenjës së fryrjes.
Në fakt, studimi vuri në dukje se “krahasuar me ujin, lëngu i limonit çoi në një rritje 1.5 herë të vëllimit të përmbajtjes së stomakut, 30 minuta pas vaktit. Zbrazja e stomakut ishte gjithashtu 1.5 herë më e shpejtë”.
– Kivi
Ngrënia e kivit çdo ditë është një mënyrë tjetër për të lehtësuar fryrjen. Sipas një studimi të vitit 2022 të botuar në revistën “Advances in Nutrition”, përfitimet duhet të fillojnë pas vetëm dy javësh. “Kivi ka efekte pozitive në tretje”, shkruajnë autorët e studimit.
Megjithatë, përfitimet e tretjes nga konsumimi i kivit nuk mbarojnë këtu. “Gjatë provave të ndërhyrjes klinike duke përdorur kivi për të përmirësuar kapsllëkun, simptomat e pjesës së sipërme gastrointestinale (GI) si shqetësimi dhe dhimbja e barkut, dispepsi dhe refluksi u lehtësuan gjithashtu”, thuhet në studim.
– Manaferrat e errët
Së fundi, ekspertët nga klinika Mayo rekomandojnë të hani “fruta me nuanca më të errëta si manaferrat, boronicat dhe luleshtrydhet, të cilat përmbajnë antioksidantë të vlefshëm” nëse shpresoni të reduktoni fryrjen.
Në një studim të vitit 2023 të botuar në revistën “Nutrients”, boronicat u zbuluan se ishin veçanërisht të dobishme në mesin e pacientëve me çrregullime funksionale gastrointestinale. /Gazeta Shneta/