Konsumimi i alkoolit i kushton miliarda euro kujdesit shëndetësor. Në këtë përfundim kanë dalë ekspertët e OBSH, që ka lancuar Manualin e Politikave për Alkoolin.
Duke u nisur nga fakti që Evropa ka nivelin më të lartë të konsumit të alkoolit globalisht, me të rriturit konsumojnë mesatarisht 9.2 litra alkool të pastër çdo vit ekspertët kanë marrë në analizë dëmet shoqërore dhe shëndetësore, me miliardat që i kushton trajtimi I sëmundjeve sistemit shëndetësor , vdekje të parakohshme, humbja e produktiviteti, si dhe dëmi social.
Dëmet nga alkooli prekin të gjitha popullatat, duke ndikuar si te individët që konsumojnë alkool, ashtu edhe te ata që nuk konsumojnë.
Ekspertët nxjerrin në pah se alkooli gjithashtu kontribuon në mënyrë të konsiderueshme në rëniet, mbytjet, djegiet, sulmet seksuale, dhunën mes partnerëve dhe vetëvrasjet, transmeton euronews përcjell albinfo.ch.
Në vitin 2019, alkooli ishte përgjegjës për gati 1 në çdo 3 vdekje nga lëndimet në Rajon, 42% të vrasjeve, 37% të vetëvrasjeve dhe 35% të vdekjeve në rrugë.
Manuali i Politikave për Alkoolin, i hartuar nga OBSh synon të ndihmojë vendimmarrësit në debatet e vazhdueshme rreth dëmeve nga alkooli dhe politikave që duhen hartuar për mbrojtjen e shëndetit publik.
Njëherazi, ekspertët bazohen në kërkime shkencore që tregojnë se asnjë nivel i konsumit të alkoolit nuk është i sigurt.