Parandalimi i demencës është një fushë kritike e hulumtimit, pasi ekspertët duan të kuptojnë se çfarë mund të bëjnë njerëzit për të ulur rrezikun e demencës.
Një studim i fundit zbuloi se marrja e medikamenteve të trajtimit të presionit të gjakut dhe atyre për uljen e lipideve u shoqëruan me një incidencë më të ulët të demencës, shkruan burimi Medical News Today përcjell Gazeta Shneta.
Në të njëjtën kohë, studiuesit zbuluan se marrja e disa ilaçeve kundër trombociteve shoqërohej me një rritje të diagnozave të demencës.
Faktorë të shumtë mund të kontribuojnë në shanset e dikujt për të zhvilluar demencë, por ka edhe faktorë të shumtë mbrojtës. Një fushë e veçantë me interes është marrëdhënia midis sëmundjeve kardiovaskulare dhe demencës.
Një studim i botuar së fundmi në revistën “Alzheimer’s & Dementia”, ekzaminoi lidhjen midis disa medikamenteve të sëmundjeve kardiovaskulare dhe rrezikut për demencë.
Studimi analizoi të dhënat nga mbi 88,000 njerëz me demencë dhe mbi 880,000 pjesëmarrës të kontrollit që ishin pa demencë.
Studiuesit zbuluan se marrja e disa ilaçeve të përshkruara zakonisht për 5 vjet ose më shumë shoqërohej me një rrezik të zvogëluar të demencës. Këto barna përfshinin:
– Antihipertensivë – barna që trajtojnë presionin e lartë të gjakut.
– Medikamente për uljen e lipideve – barna që trajtojnë kolesterolin e lartë.
– Diuretikët – barna që stimulojnë eliminimin e kripës dhe ujit të tepërt përmes urinës.
– Antikoagulantë oralë – barna që parandalojnë formimin e mpiksjes së gjakut.
Kombinimi i antihipertensivëve me medikamente për uljen e lipideve, diuretikët ose antikoagulantët oralë për 5 vjet ose më shumë, u shoqërua gjithashtu me një rrezik të reduktuar.
Në të kundërt, përdorimi i disa medikamenteve kundër trombociteve – gjithashtu një lloj hollues gjaku – u shoqërua me një rrezik në rritje për demencë.
Ndërsa kërkimet ecin përpara, ekspertët mund të jenë në gjendje të kuptojnë se si t’i përdorin më së miri këto ilaçe për të përmirësuar rezultatet e demencës. /Gazeta Shneta/