Një sëmundje e paidentifikuar ka vrarë 79 persona dhe ka prekur 376 të tjerë në Republikën Demokratike të Kongos, sipas Ministrisë së Shëndetësisë Publike, Higjienës dhe Sigurisë Sociale të vendit.
Sipas një deklarate të ministrisë, sëmundja është shfaqur në provincën Kwango në jugperëndim të Kongos dhe ka simptoma të ngjashme me gripin, përfshirë temperaturë, dhimbje koke, bllokim hundësh, kollë, vështirësi në frymëmarrje dhe anemi, shkruan NBC News, transmeton Gazeta Shneta.
Autoritetet lokale raportojnë se numri i viktimave mund të jetë deri në 143.
Ministria ka kërkuar që trupat e atyre që kanë ndërruar jetë nga simptoma të ngjashme të trajtohen vetëm nga autoritetet shëndetësore të autorizuara. Gjithashtu, ajo ka bërë thirrje për raportimin e sëmundjeve të dyshimta ose vdekjeve të pazakonta, duke këshilluar shmangien e grumbullimeve masive dhe respektimin e rregullave bazë të higjienës, si larja e duarve me sapun dhe ujë.
Një ekip i emergjencës shëndetësore është dërguar në rajon për të hetuar situatën.
Organizata Botërore e Shëndetësisë (OBSH) ka deklaruar se është në dijeni të raportimeve dhe po punon me autoritetet lokale. Një ekip është nisur në zonën e largët për të mbledhur mostra për hetime laboratorike.
Qendrat për Kontrollin dhe Parandalimin e Sëmundjeve në SHBA (CDC), të cilat kanë një zyrë në Kongo, kanë bërë të ditur se po ofrojnë ndihmë teknike për një ekip të shpejtë reagimi të organizuar nga qendra lokale e emergjencave./ Gazeta Shneta/