Protesta e thirrur nga qytetarë dhe aktivistë të shoqërisë civile është organizuar pas vrasjes së një 14-vjeçari nga një bashkëmoshatar i tij, pranë ambienteve të një shkolle në Tiranë një muaj më parë.
Në Tiranë është organizuar sërish një protestë me moton “Siguri për fëmijët”, me pjesëmarrjen e dhjetëra qytetarëve.
Protesta e thirrur nga qytetarë dhe aktivistë të shoqërisë civile është organizuar pas vrasjes së një 14-vjeçari nga një bashkëmoshatar i tij, pranë ambienteve të një shkolle në Tiranë një muaj më parë.
Protestuesit janë mbledhur fillimisht pranë Shkollës Nëntëvjeçare “Fan Noli” në Tiranë dhe kanë marshuar drejt selisë së Ministrisë së Arsimit dhe Sportit.
Sipas organizatorëve, protesta organizohet për të kërkuar nga institucionet më shumë “mbrojtje të jetës, fëmijëve dhe familjeve”.
Protestuesit mbanin në duar pankarta me mbishkrimet “Institucionet e papërgjegjshme vrasin”, “Mbroni fëmijët, siguri dhe arsim cilësor”, “Shkolla strehë e sigurt, jo fushëbetejë”, “Arsim i cunguar është i barabartë me diktaturë të garantuar” dhe të tjera.
Në protestat e ngjashme të organizuara në javët e fundit është kërkuar gjithashtu edhe shtimi i buxhetit për arsimin në 5 për qind të Prodhimit të Brendshëm Bruto (PBB), heqja e celularëve në orët e mësimit, rritja e sigurisë në shkolla dhe rritja e numrit të psikologëve në shkolla.
Gjithashtu, protestuesit kanë kërkuar dorëheqjen e ministres së Arsimit dhe Sportit, Ogerta Manastirliu.
Vrasja e 14-vjeçarit në Tiranë
Më 18 nëntor, pas një konflikti mes disa të miturve pranë një shkolle mbeti i vrarë me thikë një nxënës 14-vjeçar dhe një tjetër u plagos.
Kjo ngjarje shkaktoi reagime të organizatave të shoqërisë civile, partive politike dhe prindërve, si dhe protesta në lidhje me sigurinë në shkolla dhe ambientet përreth tyre.
Nga ana tjetër, kryeministri i Shqipërisë, Edi Rama, njoftoi nisjen e një konsultimi dhe këshillimi publik me komunitetet e prindërve në të gjitha shkollat e vendit, lidhur me bllokimin e plotë ose kufizimit të rrjeteve sociale TikTok dhe Snapchat.
Nisma në fjalë vjen pas vrasjes së 14-vjeçarit nga bashkëmoshatari i tij dhe pas rasteve të ndryshme të ekspozimit online të konflikteve mes të miturve. /TRTBalkanAlbania